মৰ্মান্তিক! আকস্মিকভাবে জীৱন নাটৰ অধ্যায় সামৰিলে অভিনেতা অখিল মিশ্ৰই

জীৱন নাটৰ পৰা মেলানি মাগিলে প্ৰখ্যাত অভিনেতা অখিল মিশ্ৰই। টিভিৰ ধাৰাবাহিকৰ পৰা আৰম্ভ কৰি ডাঙৰ পৰ্দালৈকে সকলোতে দৰ্শকক মনমুগ্ধ কৰি ৰাখিছিল অখিল মিশ্ৰই।  ইটোৰ পিছত সিটোকৈ উল্লেখযোগ্য ভূমিকাত অভিনয় কৰি আছিল অভিনেতাগৰাকীয়ে।

বুধবাৰে হঠাৎ অভিনেতাজনে জীৱনৰ অধ্যায় সামৰণি মাৰে।  পাকঘৰৰ চকী এখনত থিয় হৈ কিবা এটা কৰিবলৈ চেষ্টা কৰিছিল অভিনেতাজনে। হঠাৎ চকীখন পিছলি যোৱাত পৰি যায় অভিনেতাগৰাকী। ৰক্তাক্ত অৱস্থাত পাকঘৰৰ পৰা উদ্ধাৰ কৰি চিকিৎসালয়লৈ লৈ যোৱা হয় মিশ্ৰক। 

ইয়াৰ পিছত বুকুখন বৰকৈ বিষাবলৈ আৰম্ভ কৰে অখিল মিশ্ৰৰ। পিছত ডাক্তৰে অনুমান কৰে যে ইতিমধ্যে হৃদযন্ত্ৰ বিকল হৈ পৰিছে অভিনেতাগৰাকীৰ। 

তাতে চিকিৎসকৰ সকলো প্ৰচেষ্টা বিফল হৈ মৃত্যুৰ কোলাত ঢলি পৰিল অভিনেতাগৰাকী। 

উল্লেখ্য যে, জনপ্ৰিয় ছবি ‘৩ ইডিয়টছ’ত লাইব্ৰেৰিয়ান চৰিত্ৰত অভিনয় কৰি ৰাইজৰ বিশেষ সমাদৰ বুটলিবলৈ সক্ষম হৈছিল অভিনেতাগৰাকী।  তেওঁৰ পত্নী চুজেনো পেছাত এগৰাকী অভিনেত্ৰী।

হায়দৰাবাদত মৃত্যু হয় অভিনেতাজনৰ। মৃত্যুৰ সময়ত তেখেতৰ বয়স আছিল ৫৮ বছৰ। শেহতীয়াকৈ হায়দৰাবাদতে শ্বুটিঙত ব্যস্ত আছিল তেওঁ। 

ডন, গান্ধী মাই ফাদাৰ, শিখৰ আদি ছবিত অভিনয় কৰি জনপ্ৰিয় হৈ পৰিছিল অভিনেতা অখিল মিশ্ৰ। ইয়াৰ উপৰিও বহু টিভি ধাৰাবাহিকতো কাম কৰিছে তেওঁ। উত্তৰণ, উদন, চি আই ডি, শ্ৰীমান-শ্ৰীমতী, হাতীম আদি ধাৰাবাহিক অভিনয় কৰিও তেওঁ দৰ্শকৰ মনত সাঁচ বহুৱাবলৈ সক্ষম হৈছিল। 

এই বিশিষ্ট অভিনেতাগৰাকীৰ আকস্মিক মৃত্যুৱে এতিয়া ভাৰতৰ অভিনয় জগতখনলৈ এক শোকৰ ছাঁ কঢ়িয়াই আনিছে।