পিন্ধনত খাকী শাৰী আৰু কুৰ্তা: এছিয়ান গেমছৰ উদ্বোধনী অনুষ্ঠানত পতাকা কঢ়িয়ালে লাভলীনা-হৰমনপ্ৰীতে

কেইদিনমান পূৰ্বেই কেইবাটাও ইভেন্ট আৰম্ভ হৈ গৈছে। অৱশ্যে শনিবাৰে আনুষ্ঠানিকভাৱে গেমছ মুকলি কৰা হয়। ৮ অক্টোবৰলৈকে চলিব এছিয়ান গেমছ। ২০১৮ চনত জাকাৰ্টা এছিয়ান গেমছতকৈ অধিক পদক লাভ কৰাৰ আশা কৰিছে ভাৰতে। উদ্বোধনী অনুষ্ঠানত হকী দলৰ অধিনায়ক হৰমনপ্ৰীত সিং আৰু তাৰকা বক্সাৰ লাভলীনা বৰগোঁহাইয়ে ৰাষ্ট্ৰীয় পতাকা কঢ়িয়াই নিয়ে।

চীনৰ হাংঝুত ১৯ সংখ্যক এছিয়ান গেমছ আৰম্ভ হৈ গ’ল। ভাৰতৰ পুৰুষ হকী দলৰ অধিনায়ক হৰমনপ্ৰীত সিং আৰু টকিঅ’ অলিম্পিকৰ ৭৫ কেজি শাখাত ব্ৰঞ্জ বিজয়ী বক্সাৰ লাভলীনা বৰগোঁহাইয়ে গ্ৰেণ্ড উদ্বোধনী অনুষ্ঠানৰ মাৰ্চ পাষ্টত ভাৰতৰ পতাকা কঢ়িয়ালে।

মাৰ্চ পাষ্টত অংশ লোৱাৰ পূৰ্বে হৰমনপ্ৰীতে কয়, ‘মোক পতাকাবাহী হিচাপে দিয়া দায়িত্বৰ বাবে মই গৌৰৱান্বিত। গেমছত অংশগ্ৰহণ কৰিবলগীয়া সকলো খেলুৱৈলৈ মোৰ শুভেচ্ছা জনালো।’

পতাকাবাহী হোৱাৰ বাবে লাভলিনাও গৌৰৱান্বিত। লাভলীনাই কয়, ‘মোৰ দায়িত্বও বাঢ়ি গ’ল। অধিক স্বৰ্ণ লৈ যাতে উভতিব পাৰো তাৰ বাবে প্ৰাৰ্থনা কৰক। শ্ৰেষ্ঠ খিনি উজাৰি দিম।‘

ভাৰতীয় পুৰুষ হকী দলে টকিঅ’ অলিম্পিকত ব্ৰঞ্জৰ পদক লাভ কৰিছিল। এইবাৰ হৰমনপ্ৰীতৰ লক্ষ্য এছিয়ান গেমছত সোণৰ পদক লাভ কৰা। ভাৰতীয় পুৰুষ হকী দলে এছিয়ান গেমছত সোণৰ পদক লাভ কৰিলে পোনপটীয়াকৈ পেৰিছ অলিম্পিকলৈ যোগ্যতা অৰ্জন কৰিব।

লাভলিনাই টকিঅ’ অলিম্পিকত ব্ৰঞ্জৰ পদক লাভ কৰাৰ লগতে বিশ্ব চেম্পিয়নশ্বিপতো সোণৰ পদক লাভ কৰিছিল। এছিয়ান গেমছত সোণৰ পদক লাভ কৰাটোৱেই এতিয়া লাভলীনাৰ লক্ষ্য।