গুৱাহাটীত ড্ৰাগছ সৰবৰাহ : মহিলাসহ গ্ৰেপ্তাৰ ৪ গৰাকী ব্যক্তি

বিশেষ টাস্ক ফ’ৰ্চ অসমে চলোৱা এক অভিযানত বৃহস্পতিবাৰে গুৱাহাটীৰ খানাপাৰা অঞ্চলত চাৰিজন কুখ্যাত ড্ৰাগছ বেপাৰীক আটক কৰা হয়।

চোৰাংচোৱাৰ তথ্যৰ অনুসৰি চলোৱা এই অভিযানত ১১৯.৫ গ্ৰাম হেৰ’ইন জব্দ কৰা হয় , যাৰ আনুমানিক মূল্য ১১,১০০ টকা। অভিযানত তিনিটা মোবাইল ফোন আৰু বিভিন্ন আপত্তিজনক সামগ্ৰী জব্দ কৰে আৰক্ষীয়ে। 

খানাপাৰা উৰণীয়া সেতুৰ তলত আৰক্ষীয়ে এই ৪ জন ড্ৰাগছ ব্যৱসায়ীক গ্ৰেপ্তাৰ কৰে। 

ধৃত ব্যক্তিকেইজনৰ নাম ধন ৰাভা, আইনুল শ্বেখ, কেটেপ বড়ো, আৰু সুনৱনী বেগম। 

শেহতীয়াকৈ গুৱাহাটী মহানগৰীৰ ছয়মাইলৰ ৰহমান হাস্পতালৰ সন্মুখত এক ড্ৰাগছ ব্যৱসায় বন্ধ কৰিছিল। 

বিশেষ টাস্ক ফ’ৰ্চৰ আই জি পি পাৰ্থ সাৰথি মহন্তৰ তত্বাৱধানত আৰু অতিৰিক্ত আৰক্ষী অধীক্ষক কল্যাণ ক্ৰী পাঠকৰ নেতৃত্বত চলোৱা হৈছিল এই অভিযান।

নিৰ্ভৰযোগ্য উৎসৰ পৰা লাভ কৰা তথ্যৰ ওপৰত ভিত্তি কৰি আাৰক্ষীৰ দলটোৱে তিনিজন ড্ৰাগছ সৰবৰাহকাৰীক গ্ৰেপ্তাৰ কৰাৰ লগতে বৃহৎ পৰিমাণৰ নিচাযুক্ত দ্ৰব্য জব্দ কৰিছিল।