ICC World Cup 2023: পাকিস্তানৰ বিৰুদ্ধেও শতক; তিনিটা শতৰাণেৰে একাধিক অভিলেখ ৰাচীন ৰবীন্দ্ৰৰ

এইদৰেই আহে সুযোগ। এইদৰেই সলনি হয় ভাগ্য। এনেকৈয়ে জন্ম হয় এক নতুন তাৰকাৰ। যেনেকৈ ৰাচীন ৰবীন্দ্ৰৰ ক্ষেত্ৰত কথাটো খাটে।

নিউজিলেণ্ডৰ যুৱ বাওঁহতীয়া বেটছমেনগৰাকীয়ে ইতিমধ্যে চলিত আইচিচি এদিনীয়া বিশ্বকাপ ২০২৩-ত তিনিটা শতক অৰ্জন কৰি এক বিশেষ অভিলেখ গঢ়িবলৈ সক্ষম হৈছে।

একে সময়তে ভাৰতীয় মূলৰ ২৩ বছৰীয়া ৰাচীনে এনে প্ৰদৰ্শনৰ বাবে আন কেইবাটাও নজিৰ গঢ়ি তুলিছে। এইদৰে তেওঁ ২৫ বছৰ বয়সৰ ভিতৰত বিশ্বকাপত শতক অৰ্জনৰ শচীন তেণ্ডুলকাৰৰ অভিলেখ ভংগ কৰে।

এইবাৰৰ বিশ্বকাপৰ উদ্বোধনী মেচতে ইংলেণ্ডৰ বিৰুদ্ধে ৯৬ বলত ১২৩ ৰানত অপৰাজিত আছিল ৰবীন্দ্ৰ। অষ্ট্ৰেলিয়াৰ বিৰুদ্ধে দ্বিতীয় শতকো কৰে ৰাচীনে। নিউজিলেণ্ডে মাত্ৰ ৫ ৰানত পৰাস্ত হৈছিল যদিও ৮৯টা বলত ১১৬ ৰান আহিছিল ৰাচীনৰ বেটৰ পৰা।

এইবাৰ ৰাচীনে পাকিস্তানৰ বিৰুদ্ধে ৯৪ বলত ১০৮ ৰান সংগ্ৰহ কৰে। তেওঁ এই দুৰ্দান্ত ইনিংছটো ১৫টা চাৰি আৰু ১টা ছয়েৰে সজাইছিল।