বিড়ম্বনা! খাদ্যত নিজৰ চুলি মিহলাই বিনামূলীয়াকৈ খাদ্য গ্ৰহণৰ অপচেষ্টা মহিলাৰ

সু-সজ্জিত বিলাসী ৰেষ্টুৰেণ্টত খাদ্য গ্ৰহণৰ মন কাৰনো নাথাকে। পিছে জেপত টকা নাথাকিলে মন থাকিলেও মনক বান্ধি ৰাখিবলগীয়া হয়। অৱশ্যে এই ক্ষেত্ৰত কেতিয়াবা ভাগ্যও হ’ব পাৰে সহায়ক।

সাধাৰণতে বহু ৰেষ্টুৰেণ্টে গ্ৰাহকক প্ৰদান কৰা খাদ্যত যদি কোনো অখাদ্য দ্ৰব্য ওলায়, তেতিয়া সেই গ্ৰাহকজনক বিনামূলীয়াকৈ খাদ্য পৰিৱেশন কৰে। টকা পৰিশোধ নকৰাকৈয়ে তেতিয়া গ্ৰাহকে লাভ কৰে বিনামূলীয়া খাদ্য।

এইদৰে বিনামূলীয়া খাদ্য গ্ৰহণৰ আশাতে এক পৰিকল্পনা ৰচনা কৰি অথন্তৰৰ সন্মুখীন হৈছে এগৰাকী মহিলা। বিনামূলীয়া খাদ্যৰ আশাত এই মহিলাগৰাকীয়ে খাদ্যত মিহলাইছিল নিজৰ মূৰৰ চুলি।

পিছে তেওঁৰ এই পৰিকল্পনাত লাগিল কেণা। এই পৰিকল্পনা কাৰ্যকৰীকৰণৰ সময়ত মহিলাগৰাকীয়ে লক্ষ্য নকৰিলে ৰেষ্টুৰেণ্টখনৰ চুক-কোণ আৰু সেই ভুলৰ পৰিণতিতে তেওঁৰ গোটেই কাৰ্য বন্দী হ’ল ৰেষ্টুৰেণ্টৰ চিচিটিভি কেমেৰাত।

লগে লগে মহিলাগৰাকীৰ সমগ্ৰ পৰিকল্পনা হৈ পৰে ফুটুকাৰ ফেন। এই আমোদজনক ঘটনা ঘটিছে ইংলেণ্ডক। অবজাৰ্ভেটৰী নামৰ ইংলেণ্ডৰ ব্লেকবাৰ্ন চহৰৰ এখন জনপ্ৰিয় ৰেষ্টুৰেণ্টত ব্ৰিটিছ মহিলাগৰাকীৰ এই অপকৰ্ম ধৰা পৰে।

স্থানীয় সংবাদ মাধ্যমৰ বাতৰি অনুসৰি, মহিলাগৰাকীয়ে খাদ্যত চুলি পোৱা বুলি অভিযোগ কৰাৰ পিছতে চিন্তিত হৈ পৰে ৰেষ্টুৰেণ্টখনৰ স্বত্বাধিকাৰী। খাদ্যতনো প্ৰকৃততে কেনেকৈ চুলি ওলাল, সেয়া চিচিটিভি ফুটেজত পৰীক্ষা কৰে তেওঁ।

তেতিয়াই উদ্ধাৰ হয় মহিলাগৰাকীৰ অভিযোগৰ সত্যাসত্য। ফুটেজটোত মহিলাগৰাকীয়ে নিজৰ মূৰৰ পৰা এডাল চুলি উলিয়াই আনি সন্তপৰ্ণে খাদ্যৰ প্লেটখনত থোৱা দেখিবলৈ পোৱা যায়।

এই ঘটনাৰ পিছতে ৰেষ্টুৰেণ্টৰ মালিক টম ক্ৰফ্টে আন ব্যৱসায়ীসকলক সতৰ্ক কৰি দিয়াৰ উদ্দেশ্যে ভিডিঅ’টো সামাজিক মাধ্যমত শ্বেয়াৰ কৰে। ধন ঘূৰাই পোৱাৰ লগতে বিনামূলীয়া খাদ্যৰ মোহত এনে কাম কৰা লোকৰ পৰা আন প্ৰতিষ্ঠানসমূহে ৰক্ষা পাব বুলি আশা কৰে তেওঁ।

এই কাণ্ডৰ পিছত তেওঁৰ অত্যন্ত খং তথা বিতৃষ্ণা জন্মিছিল বুলি মন্তব্য কৰি ক্ৰফ্টে মাত্ৰ ১৫.৮৮ ডলাৰৰ খাদ্যৰ বাবে ব্যৱসায়িক প্ৰতিষ্ঠানটোৰ সুনাম তথা ব্যৱসায় আৰু কৰ্মচাৰীৰ চাকৰি বিপদত পৰিলহেঁতেন বুলি ক্ষোভ প্ৰকাশ কৰে।