জঘন্য! ড্ৰাগছ কিনিবলৈ নিজৰ এমহীয়া আৰু দুবছৰীয়া সন্তানক ৭৪ হাজাৰ টকাত বিক্ৰী দম্পতীৰ

ড্ৰাগছ আসক্ত এহাল দম্পতীয়ে ড্ৰাগছ ক্ৰয়ৰ বাবে ধনৰ ব্যৱস্থা কৰিবলৈ নিজ সন্তানক বিক্ৰী কৰি আৰক্ষীৰ জালত পৰিছে মুম্বাইৰ এহাল দম্পতী। মুম্বাই ক্ৰাইম ব্ৰাঞ্চে অভিযুক্ত দম্পতীহালকে ধৰি তিনিজন লোকক গ্ৰেপ্তাৰ কৰিছে।

আৰক্ষীয়ে লগতে আন্ধেৰীৰ পৰা উদ্ধাৰ কৰে বিক্ৰী কৰা এমহীয়া কন্যা শিশুটিক। আনহাতে দম্পতীহালৰ দুবছৰীয়া পুত্ৰ সন্তানটিৰ সন্ধান অব্যাহত ৰাখিছে আৰক্ষীয়ে।

ধৃত অভিযুক্তকেইজনক সন্তানটিৰ পিতৃ-মাতৃ ক্ৰমে ছাব্বিৰ আৰু ছানিয়া খান, আৰু আনজনক ছাকীল মাক্ৰানী বুলি চিনাক্ত কৰা হৈছে। আনহাতে শিশুটিৰ বিক্ৰীৰ এজেণ্ট উষা ৰাথোড়কো ক্ৰাইম ব্ৰাঞ্চে আটক কৰিছে।

আৰক্ষীয়ে ঘটনা সন্দৰ্ভত সদৰী কৰা মতে, ড্ৰাগছ আসক্ত দম্পতীহালে নিজৰ দুটা সন্তান বিক্ৰী কৰি আন্ধেৰীত ধন সংগ্ৰহ কৰে। এই ঘটনাৰ কথা দম্পতীহালৰ পৰিয়ালে গম পোৱাৰ লগে লগেই এই কাহিনী পোহৰলৈ আহে।

অভিযুক্ত দম্পতীহালে পুত্ৰ সন্তানটিক ষাঠি হাজাৰ টকাত আৰু এমহীয়া কন্যা সন্তানটিক চৈধ্য হাজাৰ টকাত বিক্ৰী কৰিছিল বুলি মুম্বাই ক্ৰাইম ব্ৰাঞ্চৰ এগৰাকী উচ্চপদস্থ বিষয়াই সদৰী কৰিছে।

আৰক্ষীয়ে ইতিমধ্যে অভিযুক্ত ছাব্বিৰ খান, তেওঁৰ পত্নী ছানিয়া, উষা ৰাথোড় আৰু ছাকীল মাক্ৰানীৰ বিৰুদ্ধে গোচৰ ৰুজু কৰিছে। আৰক্ষীৰ তথ্য অনুসৰি, ড্ৰাগছ আসক্ত দম্পতীহাল থাকিব নোৱাৰে ড্ৰাগছ অবিহনে।

ইয়াৰ মাজতে উষা ৰাথোড় নামৰ মহিলাগৰাকীৰ সংস্পৰ্শলৈ আহে দম্পতীহাল আৰু তেওঁৰ জৰিয়তে নিজৰ পুত্ৰক এজন ব্যক্তিক ৬০,০০০ টকাত বিক্ৰী কৰিলে। যিজন ব্যক্তিক শিশুটি বিক্ৰী কৰা হৈছিল তেওঁৰ পৰিচয় এইপৰ্যন্ত উদ্ধাৰ হোৱা নাই।

আনহাতে শেহতীয়াকৈ দম্পতীহালৰ এগৰাকী কন্যা সন্তান জন্ম হৈছিল। যোৱা মাহত তেওঁলোকে এই কন্যা সন্তানটিক ছাকীল মাক্ৰানীক ১৪ হাজাৰ টকাত বিক্ৰী কৰিছিল বুলি মুম্বাই ক্ৰাইম ব্ৰাঞ্চৰ বিষয়াগৰাকীয়ে লগতে কয়।

ইফালে অভিযুক্ত ছাব্বিৰৰ ভগ্নী ৰুবিনা খানে এই ঘটনাৰ বিষয়ে জানিব পাৰি স্থানীয় আৰক্ষী থানাত এই ঘটনাৰ খবৰ দিয়ে আৰু নিজ ভাতৃ আৰু ভাতৃ পত্নীৰ বিৰুদ্ধে এজাহাৰ দাখিল কৰে।