ধুমধামেৰে উদযাপন কৰা হ’ল মুৰ্গীৰ জন্মদিন, ৫০০ অতিথিয়ে খালে ভোজ

কেৱল মানুহৰেই নহয়, আজিকালি পোহনীয়া জীৱন-জন্তুৰো জন্মদিন পালন কৰা হয়। বহু লোকে পোহনীয়া জীৱ-জন্তুক পৰিয়ালৰ সদস্যৰ দৰেই জ্ঞান কৰে। সামাজিক মাধ্যমত পোহনীয়া কুকুৰ-মেকু্ৰীৰ জন্মদিন পালন কৰাৰ খবৰ আজিকালি প্ৰায়েই দেখিবলৈ পোৱা যায়।

শেহতীয়াকৈ এটা পৰিয়ালে নিজৰ পোহনীয়া গৰুৰ জন্মদিন উদযাপন কৰা খবৰ সামাজিক মাধ্যমত বিয়পি পৰিছিল। গৰুৰ জন্মদিন পালন কৰাৰ খবৰটোৱে যথেষ্ট চৰ্চা লাভ কৰিছিল। 

এইবাৰ এটা কুকুৰাৰ জন্মদিন পালন কৰি চৰ্চালৈ আহিছে এটা পৰিয়াল। সৰুকৈ নহয় প্ৰায় পাঁচশ লোকক নিমন্ত্ৰণ কৰি উলহ-মালহ আৰু আড়ম্বপূৰ্ণভাবে পোহনীয়া কুকুৰাৰ জন্মদিন পালন কৰিলে এটা পৰিয়ালে।

অন্ধ্ৰ প্ৰদেশৰ ভিছাখা জিলাত পালন কৰা হৈছে কুকুৰাৰ জন্মদিন। চিমলাপল্লী গাঁৱৰ নিবাসী কোটেশ্বৰ ৰাও আৰু তেওঁৰ পত্নী কবিতাই ৬ বছৰৰ আগতে ৫ টকাত কিনি আনিছিল এটা কুকুৰাৰ পোৱালী। কুকুৰাটোৰ নাম আছিল চিক্কু। 

সেই কুকুৰাটোক মৰম আৰু যত্নেৰে ডাঙৰ-দীঘল কৰিছিল দম্পতীহালে। পৰিয়ালৰ সদস্যৰ দৰেই ব্যৱহাৰ কৰিছিল কুকুৰাটোক। কুকুৰাটোক দম্পতীহালে ইমানেই মৰম কৰিছিল যে ক’ৰবালৈ গ’লে কুকুৰাটো লগতে লৈ গৈছিল। নিজৰ শোৱনি কোঠাতে ৰাখিছিল কুকুৰাটৈ। 

টিক্কু নামৰ ইউটিউব চেনেল এটাও আছে দম্পতীহালৰ। সেই চেনেলটোত পোহনীয়া কুকুৰাৰ বিষয়ে কেইবাটাও ভিডিঅ’ও পোষ্ট কৰিছিল তেওঁলোকে। শেহতীয়াকৈ ২০ নৱেম্বৰত তেওঁলোকে নিজৰ পোহনীয়া কুকুৰাৰ জন্মদিন উদযাপন কৰি ভাইৰেল হৈ পৰিছে এই দম্পতীহাল।