মৰ্মান্তিক! মঞ্চত সংগীত পৰিৱেশন কৰি থকাৰ সময়তে মৃত্যু ব্ৰাজিলৰ গায়কৰ

বুধবাৰে ব্ৰাজিলত সংঘটিত হয় এক মৰ্মান্তিক ঘটনা। উত্তৰ-পূব ব্ৰাজিলৰ এখন চহৰ ফেইৰা ডি চান্টানাত এক কনচাৰ্টত সংগীত পৰিৱেশন কৰি থকাৰ সময়তে মৃত্যু হয় ব্ৰাজিলৰ গছপেল গায়ক পেড্ৰ’ হেনৰিকৰ।

হেনৰিকে গীত পৰিৱেশন মঞ্চৰ সন্মুখলৈ আহি দৰ্শকৰ সৈতে মত বিনিময় কৰি থকাৰ সময়তে হঠাতে ঢলি পৰে। আকস্মিক এই ঘটনাত হচকিত হৈ পৰে হেনৰিকৰ সহায়ক শিল্পীসকলৰ লগতে উপস্থিত দৰ্শকসকল।

লগে লগে হেনৰিকক ওচৰৰ এখন ক্লিনিকলৈ লৈ যোৱা হয় যদিও তেওঁক মৃত ঘোষণা কৰে চিকিৎসকে। হাৰ্ট এটেকৰ বাবেই গায়কগৰাকীৰ আকস্মিক মৃত্যু ঘটা বুলি চিকিৎসকে নিশ্চিত কৰিছে।

মৃত্যুত সময়ত হেনৰিকে পত্নী ছুইলান বাৰেটো আৰু সদ্যোজাত কন্যা সন্তানটিক এৰি থৈ যায়। উল্লেখ্য যে, মাত্ৰ দুমাহ পূৰ্বে যোৱা ১৯ অক্টোবৰত তেওঁলোকৰ সংসাৰলৈ আহিছিল কন্যা সন্তান জ’।

২০১৫ চনত সংগীত জগতত পেছাদাৰী কেৰিয়াৰ আৰম্ভ কৰিছিল হেনৰিকে। প্ৰথমে তেওঁ নিজৰ ইউটিউব চেনেলত কিছু গীত আপলোড কৰিছিল।

ইয়াৰ পিছত তেওঁ স্থানীয় বেণ্ড এটাত যোগদান কৰে আৰু গোটটোৰ সৈতে তিনি বছৰীয়া সময়ছোৱাত গ্ৰেণ্ড ই অ’ চেনহ’ৰ নামৰ এটা এলবাম ৰেকৰ্ড কৰে।

২০১৯ চনত হেনৰিকে একক কেৰিয়াৰ গঢ়িবলৈ সিদ্ধান্ত লয় আৰু তেওঁৰ প্ৰথমটো একক গীত ‘নাও ফালহৌ’ মুকলি কৰে।

লক্ষণীয়ভাৱে, কিছুদিন পূৰ্বে তেওঁ নিজৰ ইউটিউব চেনেলত এটা নতুন প্ৰজেক্ট আৰম্ভ কৰাৰ পৰিকল্পনাৰ কথা ঘোষণা কৰিছিল। কিন্তু পৰিকল্পনা কাৰ্যকৰী কৰাৰ পূৰ্বেই জীৱন হেৰুৱাই গায়কগৰাকীয়ে।