আদালত কক্ষত হুইস্কিৰ বটল লৈ হাজিৰ অধিবক্তা, চলিল তৰ্কযুদ্ধ; সকলো লক্ষ্য কৰিলে মুখ্য ন্যায়াধীশে

তিনিজন ন্যায়াধীশে শুনানি গ্ৰহণ কৰিব উচ্চতম ন্য়ায়ালয়ত। সকলোৱে এজলাছত উপস্থিত হ’ল। সকলো পক্ষৰ অধিবক্তাও উপস্থিত। শুনানি আৰম্ভ হোৱাৰ লগে লগে জ্যেষ্ঠ অধিবক্তা মুকুল ৰোহতাগীয়ে অনুৰোধ জনায় যে তেওঁ দুটা হুইস্কিৰ বটল আনিব বিচাৰে। মুখ্য ন্যায়াধীশ ডি ৱাই চন্দ্ৰচুড় মান্তি হোৱাত তেওঁ দুটা বটল আনি নিজৰ টেবুলত থৈ ৰাখিলে।

এই দৃশ্য দেখি বিচাৰকসকল আচৰিত হৈ পৰিল। মুখ্য ন্যায়াধীশে হাঁহিয়েই দিলে। তেওঁ সুধিলে, ‘আপুনি লগত দুটা বটল লৈ আহিছে নেকি?’ ৰোহতাগীয়ে বুজাই দিলে যে তেওঁ এই বটল দুটা গোচৰৰ স্বাৰ্থতে লৈ আহিছে।

দৰাচলতে সুৰা প্ৰস্তুত কৰা কোম্পানীয়ে কৰা আবেদনৰ ওপৰত ভিত্তিতে এই গোচৰটো চলি আছে। শুনানিৰ সময়ত ৰোহতাগীয়ে অভিযোগটো বুজাই দিবলৈ দুটা বটল লৈ আহিছিল। সেই দুটা সন্মুখত ৰাখিয়েই তেওঁ সংশ্লিষ্ট সংস্থাৰ হৈ যুক্তি প্ৰদৰ্শন কৰে। ‘পেৰনড ৰিকাৰ্ড’ নামৰ এটা কোম্পানীয়ে আন এটা সুৰা প্ৰস্তুত কৰা কোম্পানী ‘জে কে এণ্টাৰপ্ৰাইজ’ৰ বিৰুদ্ধে গোচৰ তৰিছিল।

লগতে পঢ়কঃ হাস্পাতালত এ চি বিস্ফোৰণত পতি মৃত বুলি শুনি পত্নীয়ে দিলে প্ৰাণ; এতিয়া জীৱিত ওলাল স্বামী

‘পেৰনড ৰিকাৰ্ড’ৰ অভিযোগ যে ট্ৰেডমাৰ্ক উলংঘা কৰি অবৈধভাৱে সুৰা বিক্ৰী কৰি আছে ‘জে কে এণ্টাৰপ্ৰাইজ’। তেওঁলোকে দাবী কৰে যে ইন্দোৰৰ কোম্পানীটোৱে ‘পেৰনড ৰিকাৰ্ড’ৰ এটা সামগ্ৰীৰ নাম কপি কৰি নিজৰ সামগ্ৰীৰ নাম ৰাখিছে। আন এটা সামগ্ৰীৰ ক্ষেত্ৰত বটলৰ আকৃতিৰ ডুপ্লিকেট কৰা বুলিও দাবী কৰে। অধিবক্তাজনে শুকুৰবাৰে কোম্পানী দুটাৰ বটলৰ আকাৰৰ কিমান মিল আছে সেয়া দেখুৱাবলৈ আদালতত বটল দুটা লৈ উপস্থিত হৈছিল।

ইয়াৰ পূৰ্বে এই আৱেদন মধ্য প্ৰদেশ উচ্চ ন্যায়ালয়ত দাখিল কৰা হৈছিল। আবেদন আছিল, ‘জে কে এণ্টাৰপ্ৰাইজ’ক সেই সামগ্ৰী নিৰ্মাণ কৰিবলৈ দিব নালাগে। কিন্তু উচ্চ ন্যায়ালয়ে এই আবেদন খাৰিজ কৰে। ইয়াৰ পিছত উচ্চ ন্যায়ালয়ৰ নিৰ্দেশক প্ৰত্যাহ্বান জনাই উচ্চতম ন্যায়ালয়ত গোচৰ ৰুজু কৰা হয়। এই গোচৰটো চলি আছে মুখ্য ন্যায়াধীশ, ন্যায়াধীশ জে বি পাৰ্দিৱালা আৰু ন্যায়াধীশ মনোজ মিশ্ৰৰ বিচাৰপীঠত। উচ্চতম ন্যায়ালয়ে উচ্চ ন্যায়ালয়ৰ নিৰ্দেশ স্থগিত ৰাখিছে।

লগতে পঢ়কঃ ১১ বছৰ পিছত পেৰ’লত মুকলি হ’ল ভেলেণ্টাইন ডে’ত প্ৰেমিকাক হত্যা কৰা অলিম্পিয়ান অস্কাৰ পিষ্ট’ৰিয়াছ

শুনানিৰ শেষত অধিবক্তা ৰোহতাগীয়ে মুখ্য ন্যায়াধীশক সুধিলে, ‘মই বটল দুটা লৈ যাব পাৰোনে?’ মুখ্য ন্যায়াধীশে হাঁহি হাঁহি ক’লে, ‘হয়, হয়, নিয়ক।’