২০১২ চনৰ লণ্ডন অলিম্পিকত তেওঁ তাৰকা হিচাপে পৰিচিত হৈছিল। মূল অলিম্পিকত তেওঁ নামিছিল এজন ব্লেড ৰানাৰ হিচাপে। তাত নাপালেও পেৰালিম্পিকত আহিছিল পদক। কিন্তু সেই সফলতা, জনপ্ৰিয়তা এবছৰলৈকে নাথাকিল। দক্ষিণ আফ্ৰিকাৰ এই স্প্ৰিণ্টাৰগৰাকীয়ে ২০১৩ চনত সমগ্ৰ বিশ্বৰ দৃষ্টিত খলনায়ক হৈ পৰিছিল।
সেই বছৰৰে ১৪ ফেব্ৰুৱাৰী অৰ্থাৎ ভেলেণ্টাইন ডে’ত তেওঁ প্ৰেমিকা ৰিভা ষ্টিনকেম্পক গুলীয়াই হত্যা কৰে। ইয়াক এক ভয়ংকৰ ঘটনা হিচাপে লোৱা হয়। এতিয়া ১১ বছৰৰ পাছত পেৰ’লত কাৰাগাৰৰ পৰা মুক্তি পালে অস্কাৰ পিষ্ট’ৰিয়াছে।
অলিম্পিয়ান দৌৰবিদগৰাকীক শুকুৰবাৰে পুৱা প্ৰায় ৮:৩০ বজাত প্ৰিট’ৰিয়াৰ এটেৰিজভিল কাৰাগাৰৰ পৰা মুকলি কৰি দিয়ে।
লগতে পঢ়কঃ বাংলাদেশত চলন্ত ৰে’লত অগ্নিকাণ্ডৰ ঘটনা; ৫ জনৰ মৃত্যু, বহু হতাহতৰ আশংকা
অস্কাৰ আছিল বিশ্ব ট্ৰেক এণ্ড ফিল্ডৰ এক সুপৰিচিত মুখ। কাৰ্বন ফাইবাৰৰ কৃত্ৰিম ভৰি এখন লৈ তেওঁ ট্ৰেকত নামিছিল। প্ৰায় সকলোতে তেওঁ সফল হৈছিল। ব্লেড ৰানাৰ হিচাপে বিখ্যাত হৈছিল। বিশেষকৈ দক্ষিণ আফ্ৰিকাত অস্কাৰক প্ৰেৰণা হিচাপে দেখা গৈছিল।
২০১৩ চনৰ ভেলেণ্টাইন ডে’ৰ নিশা তেওঁৰ প্ৰিট’ৰিয়াৰ ঘৰৰ পৰা বন্দুকৰ চাৰিটা গুলীৰ শব্দ ভাহি আহিছিল। প্ৰথমতে অস্কাৰে নিজকে বচাবলৈ মিছা মাতিছিল। প্ৰাথমিক জেৰাৰ সময়ত তেওঁ কৈছিল যে তেওঁৰ ঘৰত একাংশ দুষ্কৃতিকাৰীয়ে আক্ৰমণ কৰে। তেওঁলোকৰ পৰা নিজকে বচাবলৈ গুলীচালনা কৰে। তাতেই প্ৰেয়সী ৰিভাৰ মৃত্যু হয়।
কিন্তু আৰক্ষীয়ে তদন্তৰ অন্তত সমগ্র বিষয়টো সমাধান কৰিব নোৱাৰিলে৷ অৱশেষত আচল অপৰাধী ধৰা পৰে। যোৱা ছেপ্টেম্বৰ মাহত ৰিভাৰ পিতৃৰ মৃত্যু হৈছিল। ৰিভাৰ মাতৃয়ে অস্কাৰৰ পেৰ’লৰ অনুৰোধৰ বিৰোধিতা কৰা নাছিল।
লগতে পঢ়কঃ ১ জুনৰ পৰা টি-২০ বিশ্বকাপঃ কেতিয়া হ’ব ভাৰত-পাকিস্তানৰ বহু প্ৰতীক্ষিত মেচ! চাওক সবিশেষ
অস্কাৰ পিষ্ট’ৰিয়াছক প্ৰথমে পাঁচ বছৰৰ কাৰাদণ্ড বিহা হৈছিল। পিছত উচ্চতম ন্যায়ালয়ৰ ন্যায়াধীশে উচ্চ ন্যায়ালয়ৰ ৰায় সলনি কৰে। মুঠতে ১৩ বছৰ ৫ মাহৰ কাৰাদণ্ড বিহা হয়। ২০২৩ চনত পেৰ’লৰ বাবে আবেদন কৰিছিল অস্কাৰে। কিন্তু নাকচ কৰা হয় । সম্পূৰ্ণ কাৰ্যকালৰ আধা সময় কটোৱাৰ পিছত পেৰ’লত মুকলি কৰি দিয়া হয় অস্কাৰ পিষ্ট’ৰিয়াছক।
