আঘাত! দ্বিতীয় টেষ্টৰ পৰা বাহিৰ জাদেজা, ৰাহুলঃ অৱশেষত দ্বাৰ মুকলি ছৰফৰাজৰ

ইংলেণ্ডৰ বিৰুদ্ধে চলিত টেষ্ট শৃংখলাৰ প্ৰথমখন টেষ্টত কালি অনাকাংক্ষিত পৰাজয়ৰ সন্মুখীন হোৱাৰ পিছত এইবাৰ আঘাতৰ সমস্যাত ভাৰাক্ৰান্ত হৈছে ভাৰতীয় দল। আঘাতৰ বাবে দ্বিতীয় টেষ্টৰ পৰা বাহিৰ হৈছে দুই অভিজ্ঞ তাৰকা লোকেশ ৰাহুল আৰু ৰবীন্দ্ৰ জাদেজা।

বিচিচিআই- এ এক বিবৃতি যোগে সদৰী কৰা অনুসৰি হায়দৰাবাদত অনুষ্ঠিত হোৱা প্ৰথমখন টেষ্টৰ চতুৰ্থ দিনত খেলৰ সময়ত জাদেজাই হেমষ্ট্ৰিঙৰ সমস্যাৰ সন্মুখীন হোৱাৰ বিপৰীতে ৰাহুলে সোঁ ভৰিৰ মাংসপেশীৰ বিষত ভুগিছে। সেয়ে ভাইজাগত হ’বলগীয়া দ্বিতীয় টেষ্টত দুয়ো দলত নাথাকিব।

আঘাতপ্ৰাপ্ত জাদেজা আৰু ৰাহুল সম্প্ৰতি বিচিচিআইৰ চিকিৎসা দলৰ নিৰীক্ষণত আছে বুলি বিচিচিআই- এ লগতে সদৰী কৰিছে। ৰাহুলৰ অনুপস্থিতিয়ে অৱশেষত ভাৰতীয় দললৈ দ্বাৰ মুকলি কৰিছে যুৱ তাৰকা ছৰফৰাজ খানৰ বাবে।

ঘৰুৱা ক্ৰিকেটত দীৰ্ঘদিন ধৰি উন্নত প্ৰদৰ্শনৰ ধাৰাবাহিকতা অক্ষুণ্ণ ৰখা ছৰফৰাজক বাৰে বাৰে ভাৰতীয় দলত স্থান নিদিয়াক লৈ সততে সমালোচনাৰ সন্মুখীন হৈ আহিছিল বিচিচিআই তথা দল নিৰ্বাচক। এনে সমালোচনাৰ মাজতে অৱশেষত ছৰফৰাজক ভাৰতীয় দলত অন্তৰ্ভুক্ত কৰে নিৰ্বাচকে।

ৰাহুলৰ অনুপস্থিতিত ছৰফৰাজে এগৰাকী বিশেষজ্ঞ বেটাৰ হিচাপে ভাইজাগত টেষ্ট অভিষেক ঘটোৱাৰ পূৰ্ণ সম্ভাৱনা আছে। উল্লেখ্য যে ছৰফৰাজৰ লগতে দ্বিতীয়খন টেষ্টৰ বাবে ভাৰতীয় দললৈ দুই বলিং অলৰাউণ্ডাৰ সৌৰভ কুমাৰ আৰু ৱাশ্বিংটন সুন্দৰকো আমন্ত্ৰণ জনোৱা হৈছে।

ইংলেণ্ড লায়ন্সৰ বিৰুদ্ধে তিনিখন মেচৰ টেষ্ট শৃংখলাৰ বাবে ইণ্ডিয়া এ দলৰ অংশ আছিল ছৰফৰাজ, সৌৰভ আৰু সুন্দৰ। তিনিওগৰাকী তাৰকাই এই শৃংখলাটোত দাঙি ধৰিছিল আশানুৰূপ প্ৰদৰ্শন। ইয়াৰ সুবাদতে তিনিও তাৰকাক দ্বিতীয় টেষ্টৰ বাবে দলত স্থান দিয়া হৈছে।