উত্তৰ প্ৰদেশত শোকাৱহ ঘটনাঃ বুণ্ডেলখণ্ড মহোৎসৱত আতচবাজী বিস্ফোৰণত চাৰি শিশু নিহত

উত্তৰ প্ৰদেশৰ চিত্ৰকূটৰ বুণ্ডেলখণ্ড গৌৰৱ মহোৎসৱত যোৱা নিশা সংঘটিত হৈছে এক শোকাৱহ ঘটনা। মহোৎসৱত আতচবাজী প্ৰদৰ্শনৰ সময়ত সংঘটিত বিস্ফোৰণত চাৰিটা শিশু নিহত হোৱাৰ লগতে কেইবাজনো আহত হয়।

ঘটনা সন্দৰ্ভত প্ৰয়াগৰাজ মণ্ডলৰ অতিৰিক্ত সঞ্চালক প্ৰধানগৰাকীয়ে জানিবলৈ দিয়া মতে, আৰক্ষীৰ শীৰ্ষ বিষয়াসকলৰ লগতে ফৰেনছিক দল, বোমা নিষ্কাশন স্কোৱাডৰ এটা দল ঘটনাস্থলীত উপস্থিত আছে।

জ্যেষ্ঠ বিষয়াগৰাকীয়ে লগতে প্ৰকাশ কৰা মতে, এই ঘটনা সন্দৰ্ভত তিনিজন লোকৰ বিৰুদ্ধে এফআইআৰ ৰুজু কৰা হৈছে। ইতিমধ্যে তদন্ত আৰম্ভ হৈছে আৰু এফআইআৰত অধিক লোকৰ নাম উল্লেখ হোৱাৰ সম্ভাৱনা আছে বুলি তেওঁ লগতে কয়।

নতুন দিল্লীৰ আৰু লক্ষ্ণৌৰ পৰা তদন্তৰ বাবে বিশেষজ্ঞ দল উপস্থিত হোৱা বুলি উল্লেখ কৰি তেওঁ অৱশ্যে তদন্তৰ সন্দৰ্ভত কোনো মন্তব্য কৰাৰ পৰা বিৰত থাকে। লগতে নিহত শিশুসকলৰ মৰণোত্তৰ পৰীক্ষা সম্পূৰ্ণ হোৱা নাই বুলিও তেওঁ সদৰী কৰে।

ইফালে উত্তৰ প্ৰদেশৰ মুখ্যমন্ত্ৰী যোগী আদিত্যনাথে এই ঘটনাৰ তদন্তৰ বাবে অতিৰিক্ত সঞ্চালক প্ৰধান (এডিজি) পদৰ বিষয়াৰ নেতৃত্বত উচ্চ পৰ্যায়ৰ তদন্ত সমিতি এখনক নিৰ্দেশ দিছে।

লগতে নিহতসকলৰ পৰিয়ালৰ বাবে ৫ লাখ টকা আৰু আহতসকলৰ বাবে ৫০ হাজাৰ টকাৰ আৰ্থিক সাহায্য প্ৰদান কৰাৰ কথাও ঘোষণা কৰে মুখ্যমন্ত্ৰীগৰাকীয়ে। ইফালে নিহত শিশুসকলৰ পৰিচয় এতিয়াও প্ৰকাশ কৰা নাই প্ৰশাসনে।

অতিৰিক্ত আৰক্ষী সঞ্চালক প্ৰধানগৰাকীয়ে সদৰী কৰা মতে এতিয়ালৈকে দুজন শিশুৰ পৰিয়ালক সাক্ষাৎ কৰা হৈছে। ইয়াৰে এজন এলাহাবাদৰ আৰু আনজন প্ৰয়াগৰাজৰ বাসিন্দা বুলি তেওঁ জানিবলৈ দিয়ে।