অবৈধ নিযুক্তিৰ বিৰুদ্ধে বি টি এ ডিৰ ঠিকাভিত্তিক মাধ্যমিক শিক্ষকৰ প্ৰতিবাদ

বি টি এ ডিৰ বিভাগীয় আৰু প্ৰশাসনিক অনিয়ম আৰু বে-আইনী কাম-কাজৰ পৰা ৰক্ষা পোৱাৰ বাবে ‘মাধ্যমিক শিক্ষা সবলীকৰণ আঁচনি’ৰ অন্তৰ্গত প্ৰায় ৬৫০ গৰাকী অতিৰিক্ত সহকাৰী (ঠিকাভিত্তিক) শিক্ষকসকলে সদৌ বি টি এ ডি অতিৰিক্ত সহকাৰী শিক্ষক সন্থা নামেৰে এটা সন্থা গঠন কৰিবলৈ বাধ্য হৈ পৰিছে। তেওঁলোকে বি টি এ ডি আৰু অসম চৰকাৰৰ শিক্ষা বিভাগক তেওঁলোকৰ পদসমূহ ঠিকাভিত্তিক পদৰ পৰা স্থায়ী পদলৈ পৰিবৰ্তন কৰাৰ বাবে দাবী জনাইছে। উল্লেখ্য যে তেওঁলোকে ২০১১ চনৰ পৰাই শিক্ষা দান কৰি আহিছে।

সোমবাৰে কোকৰাঝাৰ প্ৰেছ ক্লাবত সাংবাদিকৰ আগত শিক্ষক সন্থাটোৰ সভাপতি কালীচৰণ বসুমতাৰী আৰু সম্পাদক ফৗজৗনদাও বসুমতাৰীয়ে কৈছে যে তেওঁলোকে সমগ্ৰ বি টি এ ডিত ২০১১ চনৰ পৰাই  ইংৰাজী, অংক, বিজ্ঞান, সমাজ বিজ্ঞান ইত্যাদি গুৰুত্বপূৰ্ণ বিষয়সমূহৰ ওপৰত শিক্ষা প্ৰদান কৰি আহিছে।

তেওঁলোকক সংশ্লিষ্ট বৰ্ডৰ কৰ্তৃপক্ষৰ  এখন উচ্চ পৰ্যায়ৰ সাক্ষাৎকাৰ ব্যৱস্থাৰ দ্বাৰা নিৰ্বাচিত কৰা হৈছিল আৰু সন্মানীয় উচ্চ ন্যায়ালয়ে পদসমূহ নিয়মীয়া কৰাৰ বাবে বিশেষ শিক্ষক যোগ্যতা পৰীক্ষা (টেট) অনুষ্ঠিত কৰাৰ বাবে ২৬/৯/২০১৪ তাৰিখে ৩৬০ নং নিৰ্দেশ জাৰী কৰা হৈছিল।

খালি পদৰ বিপৰীতে তেওঁলোকৰ পদসমূহ পূৰণ কৰি তেওংলোকৰ পদসমূহ নিয়মীয়া কৰাৰ বাবে বাবে ০৩/০৩/২০১৬ তাৰিখে কাৰ্যালয় স্মাৰকপত্ৰ নং পি এম এ (এছ) ৩২/২০১০/২৪২ ৰ দ্বাৰা কেবিনেটত এটা সিদ্ধান্ত গ্ৰহণ কৰা হৈছিল। কিন্তু কাৰ্যালয় স্মাৰকপত্ৰ বলৱৎ নকৰি মাধ্যমিক শিক্ষাৰ সঞ্চালকে বি টি এ ডিত অনুষ্ঠিত কৰাৰ সলনি অসমৰ তেমপুৰা, যোৰহাট, ডিব্ৰুগড়, হুনগাৰী, শ্বিনটো, বহাইগাঁও আদি স্থানত বিশেষ বি টি চি টেট অনুষ্ঠিত কৰে।

তাৰোপৰি, কোকৰাঝাৰ মাধ্যমিক শিক্ষা, বি টি এ ডিয়ে ২০১৭ৰ ৫ জুলাইত স্নাতক শিক্ষকৰ খালি পদ পূৰণৰ বাবে এটা বিজ্ঞাপন প্ৰচাৰ কৰিছিল। যিহেতু কাৰ্যালয় স্মাৰকপত্ৰ নং পি এম এ (এছ) ৩২/২০১০/২৪২ এই পৰ্যন্ত বলৱৎ হোৱা নাই, শিক্ষক সংস্থাৰ সভাপতি আৰু সম্পাদকে এই অবৈধ নিযুক্তিৰ বিৰুদ্ধে উচ্চ ন্যায়ালয়ৰ দ্বাৰস্থ হৈছিল। উচ্চ ন্যায়ালয়ে বিষয়টো চালিজাৰি চাই সাক্ষাৎকাৰ প্ৰক্ৰিয়া স্থগিত ৰখাৰ বাবে এক অন্তৰ্ৱৰ্তী নিৰ্দেশ জাৰী কৰে।

কিন্তু বি টি চিৰ মাধ্যমিক শিক্ষা সঞ্চালকে প্ৰাৰ্থীসকলক নিয়োগপত্ৰ প্ৰদান কৰে। কিন্তু সাজ্ঞাৎকাৰ অনুষ্ঠিত নকৰাকৈ আৰু সঠিক প্ৰামাণিক দলিল অবিহনে কেনেদৰে নিয়োগপত্ৰ বিতৰণ হ’ব পাৰে সেয়া এটা ডাঙৰ প্ৰশ্ন বুলি তেওঁলোকে শিক্ষা বিভাগলৈ প্ৰশ্ন কৰে।

তেওঁলোকে কয় যে এই অবৈধ নিযুক্তি বন্ধ নোহোৱা পৰ্যন্ত তেওঁলোকে পাঠদান বাতিলৰ সিদ্ধান্ত গ্ৰহণ কৰিছে।