বিৰম্বনা! কেৰালা বিজেপিয়ে প্ৰচাৰ কৰিলে কেন্দ্ৰীয় চৰকাৰক উৎখাত কৰিবলৈ আহ্বান জনোৱা গীত

দুৰ্নীতিৰ বোকাত পোত গৈ থকা কেন্দ্ৰীয় চৰকাৰখনক উৎখাত কৰাৰ আহ্বান জনাই প্ৰধানমন্ত্ৰী নৰেন্দ্ৰ মোডীৰ জনকল্যাণমূলক প্ৰকল্পৰ প্ৰচাৰ কৰিছে কেৰেলাৰ বিজেপিয়ে! এই হাস্যকৰ ঘটনাত গভীৰ অস্বস্তিত পৰিছে কেৰালা বিজেপি ইউনিট।

লোকসভা নিৰ্বাচনৰ পূৰ্বে কেৰালা বিজেপিয়ে প্ৰধানমন্ত্ৰী মোডীৰ কল্যাণমূলক আঁচনিসমূহ সাধাৰণ জনতাৰ আগত প্ৰচাৰ কৰিবলৈ ৰাজ্যব্যাপী পদযাত্ৰা কাৰ্যসূচী গ্ৰহণ কৰিছে। এই পদযাত্ৰাত বেকগ্ৰাউণ্ড গীত হিচাপে মালয়ালম গীত এটা ব্যৱহাৰ কৰা হৈছে । গীতটোত কোৱা হৈছে যে দুৰ্নীতিৰ বাবে পৰিচিত কেন্দ্ৰীয় চৰকাৰখন ধ্বংস কৰিবলৈ আমাৰ সৈতে যোগদান কৰক।”

এই গীতটো প্লে কৰি কেৰালা বিজেপিৰ পদযাত্ৰাৰ ভিডিঅ’ ভাইৰেল হৈ পৰছে ছ’চিয়েল মিডিয়াত। নেটিজেনৰ হাস্যকৰ মন্তব্যৰ পিছতে এই বিষয়টো দলটোৰ ৰাজ্যিক নেতৃত্বৰ দৃষ্টিগোচৰ হয়।

সংবাদ মাধ্যম ডেকান হেৰাল্ডে প্ৰকাশ কৰা অনুসৰি, শীৰ্ষ নেতৃত্বই এই কাণ্ডৰ বাবে দায়ী ৰাজ্যিক আই টি কোষৰ নেতাসকলৰ পৰা উত্তৰ বিচাৰিছে।

কেৰালা বিজেপিৰ ভাৰপ্ৰাপ্ত বিষয়া প্ৰকাশ জাভাড়েকাৰে এই বিষয় সন্দৰ্ভত কয় যে ২০১৩ চনত ইউ পি এ চৰকাৰৰ বিৰুদ্ধে এটা গীত নিৰ্মাণ কৰা হৈছিল। কেৰালা বিজেপিৰ পদযাত্ৰাৰ সময়ত ভুলবশত সেই গীততো বজোৱা হ’ল। এনে ভুল সংবাদ মাধ্যমকে ধৰি যিকোনো প্ৰতিষ্ঠানতে ঘটে।”

তেওঁ আৰু কয়, ‘২০১৯ চনত বহু কেৰালাবাসীয়ে বিশ্বাস কৰিছিল যে ৰাহুল গান্ধী প্ৰধানমন্ত্ৰী হ’ব। কিন্তু এতিয়া সকলো কেৰেলাবাসীয়ে ভাবে যে ২০২৪ চনত পুনৰ প্ৰধানমন্ত্ৰী হ’ব নৰেন্দ্ৰ মোডী। ইয়াৰ কাৰণ হ’ল দেশৰ অগ্ৰগতি আৰু কেৰালাত কোনো ধৰণৰ বৈষম্য নোহোৱাকৈ গ্ৰহণ কৰা নিৰ্দিষ্ট সমাজ কল্যাণমূলক ব্যৱস্থা।”

এই ভিডিঅ’টোৰ উপৰিও কেৰেলা বিজেপিৰ সভাপতি কে. সুৰেন্দ্ৰনৰ এখন পোষ্টাৰক লৈ বিতৰ্কৰ সৃষ্টি হয়, য’ত সুৰেন্দ্ৰনে ৰাজ্যৰ “অনুসূচিত জাতি আৰু অনুসূচিত জনজাতিৰ নেতা”ৰ সৈতে দুপৰীয়াৰ আহাৰ গ্ৰহণ কৰিব।নেটিজেনসকলৰ মতে কেৰেলা এনে এখন ৰাজ্য য’ত জাতিগত বৈষম্য নাই। এনে পোষ্টাৰেৰে দলিত আৰু জনজাতীয় লোকক অৱমাননা কৰা হয়।