সম্পত্তি বিক্ৰী কৰি হ’লেও ভৰিব লাগিব : নীৰৱ মোদীক ৮০ লাখ ডলাৰৰ জৰিমনা বিহিলে লণ্ডনৰ আদালতে

‘পলাতক’ হীৰা ব্যৱসায়ী নীৰৱ মোদীক বৃহৎ জৰিমনা বিহিছে লণ্ডন উচ্চ ন্যায়ালয়ে। জালিয়াতিৰ গোচৰত আদালতে নীৰৱ মোডীক এই ৮০ লাখ ডলাৰৰ জৰিমনা বিহিছে।

লণ্ডনৰ আদালতে নীৰৱৰ যিকোনো সম্পত্তি বিক্ৰী কৰি এই ধন সংগ্ৰহ কৰিবলৈ বেংক অৱ ইণ্ডিয়া কৰ্তৃপক্ষক নিৰ্দেশ দিছে।

লণ্ডন আদালতত নীৰৱ মোদীৰ বিৰুদ্ধে গোচৰ তৰিছিল বেংক অৱ ইণ্ডিয়াই। বেংক কৰ্তৃপক্ষৰ তথ্য অনুসৰি ‘ফায়াৰষ্টাৰ ডাইমণ্ড এফ জে ই’ নামৰ কোম্পানীৰ পৰা বেংকটোৱে ভাৰতীয় মুদ্ৰাত মূলধন আৰু সুতসহ ৬৬ কোটি টকা পাবলৈ আছে। উল্লেখ্য যে সেই কোম্পানীটো হৈছে নীৰৱ মোডীৰ। 

আবেদনকাৰীৰ বক্তব্য শুনি লণ্ডন উচ্চ ন্যায়ালয়ে নিৰ্দেশ দিয়ে যে বেংক অৱ ইণ্ডিয়াই নীৰৱ মোদীৰ যিকোনো সম্পত্তি নিলাম কৰিব পাৰে। 

প্ৰসংগক্ৰমে ২০১৮ চনত নীৰৱ মোডীৰ ধন আত্মসাৎৰ ঘটনা প্ৰথম পোহৰলৈ আহিছিল। কেইবছৰমানৰ আগতে তেওঁক পঞ্জাৱ নেচনেল বেংকে (পিএনবি) এক বৃহৎ ঋণ দিছিল। পিছত গম পোৱা গ’ল যে নীৰৱ মোদীয়ে ভুৱা গেৰাণ্টাৰ ব্যৱহাৰ কৰি ঋণ লৈছিল। বিষয়টো পোহৰলৈ অহাৰ আগতেই নীৰৱে দেশ এৰি ব্ৰিটেইনত আশ্ৰয় লৈছিল। 

তাৰ পিছত ২০১৯ চনৰ ১৪ মাৰ্চত লণ্ডনত বেংক একাউণ্ট খুলি থকাৰ সময়তে গ্ৰেপ্তাৰ হয় নীৰৱ মোদী।