GOBAiR: গোবৰৰ পৰা শীততাপ নিয়ন্ত্ৰিত সস্তীয়া ইটা নিৰ্মাণ কৰি উলিয়াইছে আই আই টি ইন্দোৰে

আই আই টি ইন্দোৰৰ গৱেষকসকলে গোবৰৰ পৰা এটা GOBAiR নামৰ প্ৰাকৃতিক ফোমিং এজেণ্ট প্ৰস্তুত কৰিছে। আধুনিক নিৰ্মাণ সামগ্ৰী যেনে কংক্ৰিটৰ সৈতে যোগ কৰিলে GOBAiR য়ে ইয়াক যথেষ্ট লঘু কৰে, তাপ নিৰোধক উন্নত কৰে আৰু খৰচ হ্ৰাস কৰে। উল্লেখযোগ্য যে GOBAiR ভাৰতত বহনক্ষম নিৰ্মাণৰ বাবে সম্ভাৱ্য গেম-চেঞ্জাৰ হ’বলৈ গৈ আছে।

বৰ্তমান ব্যৱহৃত নিৰ্মাণ সামগ্ৰীতকৈ ২৪% সস্তা, ই গোবৰৰ প্ৰাকৃতিক অৱৰোধক গুণসমূহ একত্ৰিত কৰি গ্ৰীষ্মকালত ঘৰবোৰ ঠাণ্ডা আৰু শীতকালত উষ্ণ কৰি ৰখাত সহায় কৰে।

GOBAiR প্ৰস্তুত কৰা দলটোৰ অধ্যাপক সন্দীপ চৌধুৰীয়ে কয়, “বজাৰত উপলব্ধ ৰঙা মাটিৰ ইটা আৰু ফ্লাই এছ ইটাৰ তুলনাত এই সামগ্ৰীয়ে উন্নত অৰ্থনীতি আৰু ভাল গুণসমূহ দেখুৱাইছে। যদিহে লাভক আৰ্থিক মূল্যলৈ ৰূপান্তৰিত কৰা হয় তেন্তে বৰ্তমানৰ তিতা গোবৰৰ কেজিত ১ টকাতকৈ কম মূল্যৰ পৰা আয় কেজিত ৪ টকালৈ বৃদ্ধি পাব পাৰে।”

লগতে পঢ়কঃ ট্ৰেক এৰি দৰ্শকৰ পিনে দৌৰিল ৰেচিং কাৰ; আচম্বিত দুৰ্ঘটনাত ৭জনৰ মৃত্যু শ্ৰীলংকাত

গৱেষকসকলে এই উদ্ভাৱনী প্ৰযুক্তিটোক সুৰক্ষিত কৰাৰ বাবে পেটেণ্টো দাখিল কৰিছে আৰু ইয়াক ব্যৱহাৰ কৰি বিপথগামী গৰু-ম’হৰ যত্ন লোৱা গোশালাসমূহৰ বাবে উপাৰ্জন সৃষ্টি কৰাৰ আশা কৰিছে।