মৰ্মান্তিক! ৱাটছএপ ষ্টেটাছ লিখি বুঢ়াদিয়া নৈৰ পাৰত চৰম সিদ্ধান্ত ল’লে নাবালক প্ৰেমিক -প্ৰেমিকাই

প্ৰেমৰ কৰুণ পৰিণতি৷নলবাৰী জিলাৰ বানেকুছিৰ বুঢ়াদিয়া নৈৰ পাৰত এহাল কিশোৰ-কিশোৰীৰ মৃতদেহ উদ্ধাৰৰ ঘটনাই ৰাজ্যজুৰি চাঞ্চল্যৰ সৃষ্টি কৰিছে।বুঢ়াদিয়া নৈৰ পাৰত এজোপা গছত চিপ লৈ এহাল প্ৰেমিক-প্ৰেমিকাই চৰম পন্থা বাছি লয়। একেডাল ৰছীৰে চিপ লৈ কিশোৰ-কিশোৰীহালে শেষ নিশ্বাস ত্যাগ কৰে৷

স্থানীয় লোকে মৃতদেহ দুটা প্ৰত্যক্ষ কৰাৰ লগে লগ এই খবৰ অঞ্চলটোত বিয়পি পৰে। খবৰ পোৱাৰ পাছতে ঘটনাস্থলীত উপস্থিত হয় নলবাৰীৰ আৰক্ষী অধীক্ষক সুপ্ৰিয়া দাস। জিলা দণ্ডাধীশৰ উপস্থিতিত এই ঘটনাৰ তদন্ত আৰম্ভ কৰা হয়।

মৃত কিশোৰ-কিশোৰীহালৰ ঘৰ বাক্সাৰ বৰমাৰ দলবাৰীত বুলি জানিব পৰা গৈছে। আৰক্ষীৰ প্ৰাথমিক তদন্তত প্ৰেমৰ বাবেই এই সিদ্ধান্ত লোৱাৰ সন্দেহ কৰা হৈছে।

এতিয়া প্ৰশ্ন হৈছে কিয় এইদৰে নৈৰ পাৰত চূড়ান্ত সিদ্ধান্ত বাচি ল’লে প্ৰেমিকহালে? জানিব পৰা মতে, দুয়োগৰাকীৰে মাজত দীৰ্ঘদিন ধৰি আছিল প্ৰেমৰ সম্পৰ্ক। সেই কথা দুয়োখন ঘৰেই জানিছিল। মৃত কিশোৰজনৰ আত্মীয়ৰ অভিযোগ, কিশোৰীগৰাকীৰ পৰিয়ালে কিশোৰজনৰ ওপৰত মানসিকভাৱে হেঁচা দি আহিছিল। কিন্তু উপযুক্ত বয়স নোহোৱা বাবে দুয়োৰে মাজত বিবাহ সম্ভৱ হোৱা নাছিল। এইবাৰ হাইস্কুল শিক্ষান্ত পৰীক্ষাত উত্তীৰ্ণ হৈছিল কিশোৰীগৰাকী।বয়স অনুসৰি দুয়োগৰাকী নাবালক। গতিকে আইনগতভাৱে দুয়োৰে বিবাহৰ বয়স হোৱা নাছিল । কিন্তু অভিযোগানুসৰি কিশোৰীগৰাকীৰ পৰিয়ালে কিশোৰজনক বাৰম্বাৰ চাপ দি আহিছিল ।

জানিব পৰা মতে, কিশোৰজনে মৃত্যুৰ পূৰ্বে হোৱাটছএপত দিছিল বিশেষ এটা ষ্টেটাছ। কিশোৰীগৰাকীৰ কপালত সেন্দুৰ পিন্ধাই দুয়ো একেলগে উঠা এখন ফটোৰ লগতে এডাল ৰছীৰ ফটো কিশোৰজনে ষ্টেটাছত দিছিল ।কিশোৰজনে ষ্টেটাছত লিখিছিল – ‘‘গুড বাই অল, লাষ্ট অপচন আমাৰ সঁচা প্ৰেমেই, মা-পাপা হেপ্পী থাকিবা, আমাকতো এনেও যোৰা নকৰিলাই হয়, কিন্তু এতিয়া ভালকৈ দুয়োটাকে একেস্থানত ৰাখিলেই হ’ল।’’