শ্বেখ হাছিনাক ক্ষমতাচ্যুত কৰাত জড়িত নহয় আমেৰিকা; স্পষ্ট কৰিলে হোৱাইট হাউছে

শ্বেখ হাছিনাক ক্ষমতাচ্যুত কৰাত আমেৰিকাৰ ভূমিকা আছে বুলি উত্থাপিত অভিযোগ অস্বীকাৰ কৰিছে ৱাশ্বিংটনে। কালি ৱাশ্বিংটনত অনুষ্ঠিত এক প্ৰেছ ব্রিফিঙত হোৱাইট হাউছৰ প্রেছ সচিব কেৰিন জিন পিয়েৰে কয় যে এনে অভিযোগ সম্পূর্ণ মিছা৷

ব্রিফিঙত কেৰিন জিন পিয়েৰক সোধা হৈছিল, বাংলাদেশৰ প্রাক্তন প্রধানমন্ত্রী শ্বেখ হাছিনাই অভিযোগ কৰিছিল যে তেওঁক ক্ষমতাৰ পৰা পদত্যাগ কৰিবলৈ বাধ্য কৰাত আমেৰিকাৰ ভূমিকা আছে৷ তেওঁৰ (শ্বেখ হাছিনাৰ) এনেকুৱা ভাগ্যৰ কাৰণ তেওঁ বাংলাদেশৰ এটা দ্বীপ ৱাশ্বিংটনক গতাই দিয়া নাছিল। দ্বীপটো এৰি দিবলৈ সন্মত হ’লে হয়তো তেওঁ ক্ষমতাত থাকিলহেঁতেন। এনে অভিযোগৰ প্ৰতি আমেৰিকা প্ৰশাসনৰ সঁহাৰি কি?

লগতে পঢ়কঃ আদানীৰ শ্বেয়াৰত বৃহৎ পতন! বিশ্বজুৰি উঠিছে মাধৱীৰ পদত্যাগৰ দাবী

ইয়াৰ উত্তৰত কেৰিন জিন-পিয়েৰে কয়, ‘আমি ইয়াৰ লগত কোনোধৰণে জড়িত নহয়। আমেৰিকা প্ৰশাসন জড়িত থকা সম্পৰ্কীয় যিকোনো বাতৰি বা চৰ্চা সম্পূৰ্ণ মিছা, একেবাৰে সত্যতা নাই।‘

কেৰিন জিন পিয়েৰে লগতে কয়, ‘বাংলাদেশৰ মানুহে নিজৰ বাবে এই পছন্দ বাছি লৈছে। বাংলাদেশ চৰকাৰৰ ভৱিষ্যৎ দেশৰ জনসাধাৰণে সিদ্ধান্ত ল’ব বুলি আমি বিশ্বাস কৰোঁ৷ এয়া আমাৰ স্থিতি। গতিকে যদি এনে কোনো অভিযোগ উত্থাপন হয়, মই ইয়াত যি কৈছো, মই সদায় সেইটো ক’ম, সেয়া একেবাৰেই সঁচা নহয়।‘

যোৱা দেওবাৰে ভাৰতৰ একাংশ সংবাদ মাধ্যমত শ্বেখ হাছিনাই ছেইণ্ট মাৰ্টিন দ্বীপ দিবলৈ সন্মত নোহোৱাৰ বাবে তেওঁক ক্ষমতাচ্যুত কৰা বুলি দিয়া এক বাৰ্তাৰ বাতৰি প্ৰকাশ কৰিছিল। তাত কোৱা হৈছিল যে ইয়াৰ আঁৰত আছে আমেৰিকা।

লগতে পঢ়কঃ ফাৰ্মাচিউটিকেল ইনষ্টিটিউট পৰিদৰ্শনৰ নামত কেলেংকাৰী; গ্ৰেপ্তাৰ বিশ্ববিদ্যালয়ৰ দুই অধ্যাপক

অৱশ্যে দেওবাৰে নিশা ১১:৫৫ বজাত শ্বেখ হাছিনাৰ পুত্ৰ ছাজিব ৱাজেদ জয়ে তেওঁৰ ভেৰিফাইড একাউণ্টৰ পৰা মেছেজ প্ৰেৰণ কৰে। তাত তেওঁ লিখিছে, ‘মাৰ পদত্যাগ সন্দৰ্ভত এটা বক্তব্য সংবাদ মাধ্যমত প্ৰকাশ পাইছে, যিটো সম্পূৰ্ণ মিছা আৰু মনেসজা। অলপ আগতে তেওঁৰ (শ্বেখ হাছিনা)ৰ লগত কথা পাতি নিশ্চিত কৰিলোঁ। ঢাকা এৰি যোৱাৰ আগতে বা ঢাকা এৰি যোৱাৰ পিছতো তেওঁ কোনো বক্তব্য দিয়া নাই।