চাৰিশৰীয়া ৰাষ্ট্ৰীয় ঘাইপথ নিৰ্মাণৰ বাবে কটা হৈছে ৬,৮৫২ জোপা গছ : RTI ৰ উত্তৰত ভয়ংকৰ তথ্য

অবাধে গছ কটাটোৱেই যেন এতিয়া মূল কাম হৈছে ৰাষ্ট্ৰীয় ঘাইপথ নিৰ্মাণ প্ৰাধিকৰণৰ। অসোৰ ইমূৰৰ পৰা সিমূৰলৈ চাৰিশৰীয়া ঘাইপথ সম্প্ৰসাৰণ কৰাৰ নামত হাজাৰ বিজাৰ গছ কাটি অভিলেখ সৃষ্টি কৰিছে ৰাষ্ট্ৰীয় ঘাইপথ নিৰ্মাণ প্ৰাধিকৰণে।

তথ্য জনাৰ অধিকাৰ আইন অনুসৰি কেৱল যোৰহাট জিলাতে চাৰিশৰীয়া পথ সম্প্ৰসাৰণৰ নামত কাটি পেলোৱা হৈছে ৬,৮৫২ জোপা গছ।

প্রাপ্ত তথ্য মতে, জিলাখনৰ কাকডোঙা দলঙৰ পৰা জাঁজী নৈৰ দলঙলৈকে যোৰহাট জিলা বন-সংমণ্ডলৰ অধীনত মূল্যবান শাল, চেগুন, গমাৰীৰ দৰে মূল্যবান গছৰ লগতে আম, কঁঠাল, জামু, শিমলু, পমা, চটিয়না, নীম, মজ, বৰ, জৰী, কৃষ্ণচূড়া, কৰছ, কদম, আজাৰ, মদাৰ, ৰেইন টী, ইউক্লিপটাছ আদিকে ধৰি মুঠ ৬,৮৫২ জোপা গছ কাটি পেলোৱা হৈছে।  উল্লেখ্য যে এই কটা গছসমূহৰ চৰকাৰী মূল্য ২৪,৭৩,৩৯৬ টকা বুলি তথ্য প্ৰদান কৰিছে বিভাগটোৱে।

ইফালে এইদৰে গছবোৰ কটাৰ বিপৰীতে ৰাষ্ট্ৰীয় ঘাইপথৰ দুয়োপাৰ আকৌ সেউজ কৰি তোলাৰ বাবে কোনো ব্যৱস্থা গ্ৰহণ কৰা নাই বিভাগটোৱে। তাৰ সলনি পথৰ মাজত ডিভাইডাৰত হে কেইটামান গছপুলি ৰোপণ কৰিছে।

এই তথ্যৰ পিছত এতিয়া ক্ষোভত জ্বলি উঠিছে সচেতন ৰাইজ। এইদৰে গছ ধ্বংস কৰাৰ বিৰোধিতা কৰিছে বিভিন্ন দল সংগঠনে।