ছহিদ পত্নীৰ লগতে পিতৃ-মাতৃলৈয়ো ক্ষতিপূৰণ; বিতৰ্কৰ মাজতে ঘোষণা মধ্য প্ৰদেশ চৰকাৰৰ

কৰ্তব্যৰত অৱস্থাত এজন আৰক্ষীৰ মৃত্যু হ’লে ক্ষতিপূৰণ তেওঁৰ পত্নীৰ লগতে পিতৃ-মাতৃকো দিয়া হ’ব। মধ্যপ্ৰদেশৰ মুখ্যমন্ত্ৰী মোহন যাদৱে শেহতীয়াকৈ এই কথা ঘোষণা কৰিছে। তেওঁৰ চৰকাৰে এই সিদ্ধান্ত লৈছে। এই নিয়ম কেৱল মধ্যপ্ৰদেশ আৰক্ষী বিভাগৰ ক্ষেত্ৰতহে প্ৰযোজ্য হ’ব। কিছুদিন পূৰ্বে ভাৰতীয় সেনাৰ কেপ্তেইন অংশুমান সিঙৰ মৰণোত্তৰ সন্মান ‘কীৰ্তি চক্ৰ’ক লৈ বিতৰ্কৰ সৃষ্টি হৈছিল। কেপ্তেইনৰ পিতৃ-মাতৃয়ে দাবী কৰে যে তেওঁলোকৰ বোৱাৰীয়েকে ‘কীৰ্তি চক্ৰ’ লৈ ঘৰৰ পৰা ওলাই গৈছে। লগতে সেনাবাহিনীৰ ‘নেক্সট অৱ কিন’ নীতি সলনি কৰাৰ দাবী উত্থাপন কৰে। তাৰ ভিতৰত মধ্যপ্ৰদেশ চৰকাৰৰ এই সিদ্ধান্ত তাৎপৰ্যপূৰ্ণ বুলি বিবেচিত হৈছে।

মধ্যপ্ৰদেশত কৰ্তব্যৰত অৱস্থাত যদি কোনো আৰক্ষীৰ মৃত্যু হয় তেন্তে তেওঁৰ পৰিয়ালে চৰকাৰৰ পৰা এক কোটি টকাৰ ক্ষতিপূৰণ লাভ কৰে। ইমান দিনে পুলিচজনৰ বিয়া হ’লে পত্নীয়ে সেই টকাখিনি পালেহেঁতেন৷ নতুন ঘোষণা অনুসৰি মৃত্যুৰ পিছৰ ক্ষতিপূৰণ আৰক্ষী জোৱানজনৰ পত্নী আৰু পিতৃ-মাতৃৰ মাজত সমানে ভাগ কৰা হ’ব। অৰ্থাৎ পত্নীয়ে ৫০ লাখ টকা আৰু পিতৃ-মাতৃয়ে ৫০ লাখ টকা পাব।

প্ৰসংগক্ৰমে কেপ্তেইন অংশুমান আছিল সেনা চিকিৎসা সেৱাৰ এজন বিষয়া। ২০২৩ চনৰ ১৯ ​​জুলাইত ছিয়াচেনত থকা সেনা শিবিৰৰ গোলাবাৰুদ ভঁৰাল কক্ষত অগ্নিকাণ্ড সংঘটিত হয়। সেই ঘটনাত অংশুমানৰ মৃত্যু হয়। মৃত্যুৰ পূৰ্বে তেওঁ চাৰি-পাঁচজনৰ প্ৰাণ ৰক্ষা কৰিছিল। যোৱা ৫ জুলাইত তেওঁৰ মৰণোত্তৰ সন্মান ‘কীৰ্তি চক্ৰ’ অংশুমানৰ মাতৃ আৰু পত্নীক অৰ্পণ কৰা হয়। মাত্ৰ পাঁচ মাহ আগতে তেওঁৰ বিয়া হৈছিল। ইয়াৰ পাছতে তেওঁক ছিয়াচেনলৈ বদলি কৰা হয়।

ৰাষ্ট্ৰপতি দ্ৰৌপদী মুৰ্মুৱে ছহিদজনৰ পত্নী আৰু মাতৃক এই সন্মান প্ৰদান কৰে। অনুষ্ঠানৰ কিছুদিন পাছতে কেপ্তেইনৰ পিতৃ-মাতৃয়ে দাবী কৰে যে তেওঁলোকৰ বোৱাৰীয়েকে ‘কীৰ্তি চক্ৰ’ক লগত লৈ পিতৃৰ ঘৰলৈ লৈ গৈছিল। চৰকাৰী ৰেকৰ্ডতো তেওঁৰ ঠিকনা সলনি কৰিছে। অভিযোগ অনুসৰি পুত্ৰৰ কাপোৰ আৰু সকলো নথি-পত্ৰ লগত লৈ গৈছিল। সন্তানহীন দম্পতীয়ে কয় যে তেওঁলোকৰ হাতত পুত্ৰৰ এখন ছবিৰ বাহিৰে আন একো নাই। কেপ্তেইনৰ পিতৃ ৰবি প্ৰতাপ সিঙে কয়, ‘ভাৰতীয় সেনাবাহিনীত ‘নেক্সট অৱ কিন’ৰ বাবে যি মাপকাঠী নিৰ্ধাৰণ কৰা হৈছে, সেই মাপকাঠী সলনি কৰিব লাগে। ইয়াৰ সংজ্ঞা পুনৰ বিবেচনা কৰা উচিত। প্ৰতিৰক্ষা মন্ত্ৰী ৰাজনাথ সিঙৰ সৈতে কথা পাতিলোঁ। অংশুমানৰ ঘৈণীয়েক আৰু আমাৰ লগত নাথাকে। বিয়াৰ মাত্ৰ পাঁচ মাহ হৈছে। তেওঁলোকৰ কোনো সন্তান নাই। আমাৰ হাতত ল’ৰাটোৰ ছবি এখনৰ বাহিৰে একো নাই।প্ৰয়াত কেপ্তেইনৰ পিতৃৰ অভিযোগক লৈ ছ’চিয়েল মিডিয়াত চৰ্চা চলিছিল। এনে পৰিস্থিতিত মধ্যপ্ৰদেশ চৰকাৰৰ এই ঘোষণাই এক সুকীয়া তাৎপৰ্য্য বহন কৰিছে বুলি বিশেষজ্ঞৰ এটা দলে প্ৰকাশ কৰিছে।