৭৫ শতাংশ কৰ্মৰত মাতৃয়ে দৰমহা কৰ্তন, পদোন্নতি আৰু ছুটীৰ সমস্যাৰ সন্মুখীন হয়; আন্তঃৰাষ্ট্ৰীয় সমীক্ষাত উজাগৰ তথ্য

ভাৰতত কৰ্পৰেট খণ্ডত কৰ্মৰত মাতৃসকলে বহু প্ৰত্যাহ্বানৰ সন্মুখীন হৈছে। ইয়াৰ ভিতৰত আটাইতকৈ উল্লেখযোগ্য সংকটটো হ’ল ভাৰতীয় মহিলাসকলে কৰ্মক্ষেত্ৰত প্ৰসূতিকালৰ ব্যাপক ক্ষতিৰ সন্মুখীন হ’বলগীয়া হৈছে। এক অধ্যয়ন অনুসৰি দেশৰ ৭৫ শতাংশ কৰ্মৰত মহিলাই প্ৰসূতিকালীন ছুটীৰ পাছত কৰ্মশক্তিত যোগদান কৰাৰ এবছৰৰ পৰা দুবছৰৰ পাছত কেৰিয়াৰত বিপৰ্যয়ৰ সন্মুখীন হয়। কৰ্মক্ষেত্ৰৰ বিপদ, অবসৰ আৰু স্বাস্থ্য সমাধানৰ ওপৰত সেৱা প্ৰদান কৰা আন্তঃৰাষ্ট্ৰীয় পেছাদাৰী সংস্থা এ অ’ এনৰ এক সমীক্ষা অনুসৰি এই কথা প্ৰকাশ পাইছে।

প্ৰসূতিকালীন ছুটী লোৱা এই মহিলাসকলৰ ভিতৰত কমেও ৪০ শতাংশৰ দৰমহা কৰ্তন বা হ্ৰাস কৰা হৈছে বুলি অধ্যয়নটোত প্ৰকাশ পাইছে। আনকি বহুতকে পদবী আৰু দায়িত্বৰ পৰা মুক্ত কৰি ভাল নোপোৱা চাকৰিও দিয়া হৈছে। অধ্যয়নটোৱে প্ৰকাশ কৰা অনুসৰি কৰ্মক্ষেত্ৰত মহিলাসকলে অহৰহ পক্ষপাতিত্ব আৰু বৈষম্যৰ সন্মুখীন হয়। সংস্থাটোৱে এই তথ্য প্ৰদান কৰিছে ভইচ অৱ উইমেন ষ্টাডি ২০২৪ শীৰ্ষক এক সমীক্ষাত।

দেশৰ প্ৰায় ৫৬০টা কোম্পানীৰ ২৪ হাজাৰ মহিলাৰ ওপৰত কৰা এই সমীক্ষা। প্ৰতিবেদন অনুসৰি সমীক্ষাত অংশগ্ৰহণ কৰা আধা মহিলাই কৰ্মক্ষেত্ৰত পক্ষপাতিত্ব আৰু বৈষম্যৰ সন্মুখীন হোৱা বুলি স্বীকাৰ কৰিছে। দৰমহা আৰু প্ৰৰোচনাৰ ক্ষেত্ৰতো ৩৭ শতাংশ মহিলাই এই আচৰণৰ বলি হৈছিল। ৬ শতাংশই কৰ্মক্ষেত্ৰত যৌন নিৰ্যাতনৰ কথা স্বীকাৰ কৰিছে। ইয়াৰে আধাতকৈও কম লোকে চৰকাৰী অভিযোগৰ স্তৰত উপনীত হয়।

কেৰিয়াৰ প্ৰমোচনত লিংগ বৈষম্য বা পক্ষপাতিত্ব দেখা যায়। অভিজ্ঞতাৰ ফালৰ পৰা নাৰী আগবাঢ়িলেও তেওঁলোকৰ বিৰুদ্ধে বৈষম্য কৰা হয়। প্ৰতিবেদনত কোম্পানী আৰু শীৰ্ষ বিষয়াসকলক এই বিষয়সমূহৰ ওপৰত নীতি আৰু ব্যৱহাৰিক দুয়োটা দিশতে কাম কৰিবলৈ আহ্বান জনোৱা হৈছে। বিশেষকৈ সমান দৰমহা, পদোন্নতি আৰু প্ৰসূতিৰ সুবিধাৰ ক্ষেত্ৰত।