বি টি চিৰ শিক্ষক নিযুক্তি প্ৰক্ৰিয়াত ব্যাপক অনিয়মৰ অভিযোগ

বি টি চিৰ অধীনৰ প্ৰাথমিক আৰু উচ্চ প্ৰাথমিক বিদ্যালয়ৰ শিক্ষক নিযুক্তিৰ বাবে কালি ঘোষণা কৰা চূড়ান্ত তালিকাত যথেষ্ট আসোঁৱাহ আৰু অস্পষ্টতা ৰৈ যোৱাৰ গুৰুতৰ অভিযোগ উঠিছে। ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে এই ঘটনাৰ এক তদন্ত বিচাৰিছে আৰু ৰাজনৈতিক স্বজন-তোষণৰ বাবে যাতে মেধাসম্পন্ন প্ৰাৰ্থীক বঞ্চিত কৰি কম মেধাৰ প্ৰাৰ্থীয়ে অগ্ৰাধিকাৰ নাপায় তাৰ ব্যৱস্থা কৰিবলৈ বি টি চিৰ মুখ্য প্ৰশাসক প্ৰমোদ বড়োৰ লগতে মুখ্যমন্ত্ৰীৰ হিমন্ত বিশ্ব শৰ্মাৰ ওচৰত দাবী উত্থাপন কৰিছে।

বি টি চিৰ শিক্ষা বিভাগৰ পক্ষৰ পৰা কালি প্ৰাথমিক আৰু উচ্চ প্ৰাথমিক বিদ্যালয়ৰ শিক্ষক পদৰ চূড়ান্ত বাচনী তালিকা প্ৰকাশ কৰা হয় আৰু আচৰিত ধৰণে আজি ৰাতিপুৱা ৮.৩০ বজাৰ ভিতৰত প্ৰাৰ্থীসকলক জিলা শিক্ষা বিষয়াৰ সন্মুখত উপস্থিত হ’বলৈ নিৰ্দেশ দিয়া হয়। আচৰিত কথাটো হৈছে চূড়ান্ত তালিকাত নিৰ্বাচিত হোৱা প্ৰাৰ্থীসকলৰ প্ৰাপ্ত নম্বৰসমূহৰ বিষয়ে কোনো উল্লেখ নাই। ভেৰিফিকেশ্বনৰ পাছত যি নম্বৰৰ ভিত্তিত তালিকা প্ৰকাশ কৰা হৈছিল সেই তালিকাৰ একেবাৰে তলত থকা প্ৰাৰ্থীৰ নামো চূড়ান্ত বাচনী তালিকাত স্থান লাভ কৰাৰ অভিযোগ উঠিছে। চূড়ান্ত তালিকাত প্ৰাৰ্থীৰ কোনো নম্বৰ প্ৰকাশ নকৰা কাৰ্যই সন্দেহ গভীৰ কৰি তুলিছে।

একেদৰে বি টি চি বাহিৰৰ প্ৰাৰ্থীও তালিকাত নাম অন্তৰ্ভুক্ত কৰিবলৈ সক্ষম হৈছে। আচৰিত ধৰণে বি টি চিৰ শিক্ষা বিভাগে বিজ্ঞাপন প্ৰকাশৰ পাছত জাৰি কৰা নতুন নতুন নিৰ্দেশনাই নানা প্ৰশ্ন আৰু সন্দেহৰ সৃষ্টি কৰিছে। সমগ্ৰ প্ৰক্ৰিয়াটোত একাংশ প্ৰাৰ্থীক বিশেষ অগ্ৰাধিকাৰ দি অন্যায়ভাৱে যে চূড়ান্ত বাচনী তালিকাত স্থান দিছে সেয়া এনেবোৰ কৰ্মকাণ্ডই প্ৰমাণ কৰিছে।

ডি ৱাই এফ আইয়ে দাবী কৰিছে এই সমগ্ৰ ঘটনাৰ বিটিচি প্ৰধান প্ৰমোদ বড়োই স্পষ্টীকৰণ দিয়ক আৰু অনিয়মৰ তদন্ত কৰি বঞ্চিত মেধাসম্পন্ন প্ৰাৰ্থীক শিক্ষক হিচাপে নিযুক্তি দিয়ক।