অন্ধকাৰৰ সুযোগ লৈ সংগ্ৰহালয়ত ১৫ কোটি টকাৰ প্ৰাচীন সামগ্ৰী চুৰি! চিনেমাৰ কায়দাত সম্পাদন কাৰ্য

এটা সুপৰিকল্পিত চুৰিকাণ্ড৷পৰিকল্পনা অনুসৰি দেওবাৰে চোৰে টিকট কিনি সংগ্ৰহালয়ত প্ৰৱেশ কৰে। সোমবাৰে বন্ধ। চোৰে গোটেই ৰাতি চিৰিৰ তলত বহি আছিল এই ধাৰণা লৈ যে তেওঁ লোকচক্ষুত নপৰাকৈয়ে চুৰি কৰিব পাৰিব। পিছে আৰক্ষীৰ কোপৰ পৰা নাবাচিল চোৰ৷

মধ্য প্ৰদেশৰ ভূপাল ৰাজ্যিক সংগ্ৰহালয়ত সংঘটিত হৈছে এই ঘটনা। বিনোদ নামৰ চোৰটোৰ মূল উদ্দেশ্য আছিল দেওবাৰে সংগ্ৰহালয়ত প্ৰৱেশ কৰি সোমবাৰে পলায়ন। তেতিয়ালৈকে কৰ্তৃপক্ষই আৰক্ষীক জনাইছিল যে গুপ্ত, মোগল আৰু নবাব যুগৰ প্ৰাচীন সামগ্ৰী নিৰুদ্দেশ হৈছে। একেদৰে মহানগৰীৰ সকলো প্ৰৱেশদ্বাৰ আৰু প্ৰস্থান পথ অৱৰোধ কৰা হয়। আনহাতে, পলায়ন কৰাৰ সময়ত মিউজিয়ামৰ বাহিৰত কটকটীয়া নিৰাপত্তা দেখা পাই বিনোদে ওলাই আহিবলৈ ২৫ ফুটৰ বেৰৰ ওপৰেৰে উঠিছিল। পৰিকল্পনা সম্ভৱ নহ’ল। তাতে জোপোহাৰ দাঁতিত পৰিল।

তিনিজনীয়া আৰক্ষীৰ তদন্তকাৰী দলে যেতিয়া সংগ্ৰহালয়টোত তালাচী আৰম্ভ কৰে, তেতিয়া তেওঁলোকে বিনোদক জোপোহাৰ পৰা উদ্ধাৰ কৰে। তাত তেওঁৰ বেগৰ পৰা প্ৰায় এশটা চুৰি মুদ্ৰা আৰু পদক উদ্ধাৰ কৰা হয়।

আৰক্ষীয়ে জনোৱা মতে, ৪৯ বছৰীয়া বিনোদ গয়াৰ বাসিন্দা। জোপোহাত পৰাৰ ফলত তেওঁৰ শৰীৰটো গুৰুতৰভাৱে আঘাতপ্ৰাপ্ত হয়। আৰু তেওঁ পলায়নৰ পথ বিচাৰি নাপালে। মঙলবাৰে সেই স্থানৰ পৰাই তেওঁক গ্ৰেপ্তাৰ কৰা হয় বুলি আৰক্ষী বিষয়াসকলে জানিবলৈ দিয়ে।

ভাৰতীয় প্ৰত্নতাত্ত্বিক জৰীপৰ প্ৰাৰম্ভিক হিচাপ অনুসৰি চুৰি হোৱা সামগ্ৰীসমূহৰ মূল্য ১২ৰ পৰা ১৫ কোটি টকা। ইতিমধ্যে বিনোদৰ সৈতে সংঘটিত ঘটনাত আৰু কোনো লোক জড়িত আছে নে নাই সেই বিষয়ে জানিবলৈ ছয়জনীয়া আৰক্ষীৰ এটা দল গঠন কৰা হৈছে।