লক্ষ্ণৌত ভাঙি পৰিল কেইবামহলীয়া অট্টালিকা! মৃত্যুৰ সংখ্যা ৮ জনলৈ বৃদ্ধি, আহত ২৮ জন

লক্ষ্ণৌত এটা বহুমহলীয়া গৃহ ভাঙি মৃত্যুৰ সংখ্যা আঠলৈ বৃদ্ধি পায়।শনিবাৰে গোটেই নিশা উদ্ধাৰ অভিযান চলাই আছে। আৰক্ষীৰ সূত্ৰ অনুসৰি দেওবাৰে পুৱা তিনিটা মৃতদেহ উদ্ধাৰ কৰা হয়। এই পৰ্যন্ত আহত লোকৰ সংখ্যা ২৮ জন। ৰাজ্যিক দুৰ্যোগ সঁহাৰি বাহিনী আৰু অগ্নিনিৰ্বাপক বাহিনীয়ে এতিয়াও কোনো লোক ধ্বংসাৱশেষৰ তলত আবদ্ধ হৈ আছে নেকি চাবলৈ অভিযান চলাইছে।

আৰক্ষীৰ সূত্ৰ অনুসৰি দেওবাৰে পুৱা যিসকলৰ মৃতদেহ উদ্ধাৰ হয় তেওঁলোক হ’ল কিশোৰ (২৭), ৰুদ্ৰ যাদৱ (২৪) আৰু জগৰুপ সিং (৩৫)। ভাঙি পৰা বহুমহলীয়া অট্টালিকাটো এটা ঔষধ কোম্পানীৰ গুদাম হিচাপে ব্যৱহাৰ কৰা হৈছিল। শনিবাৰে সন্ধিয়া ৫ বজাত ভাঙি পৰে। আৰক্ষীয়ে জনোৱা মতে, এই বহুমহলীয়া ভৱনটো চাৰি বছৰ পূৰ্বে নিৰ্মাণ কৰা হৈছিল। তাত কেইবাদিনো মেৰামতিৰ কাম চলি আছিল। তেতিয়াই বহুমহলীয়া অট্টালিকাটো ভাঙি পৰিল।

তলৰ মহলাত নিৰ্মাণ শ্ৰমিকে কাম কৰি থকাৰ সময়তে অট্টালিকাটো ভাঙি পৰে। যাৰ ফলত তেওঁলোক আশ্চৰ্যচকিত হৈ পৰে। ফাৰ্মাচিউটিকেল কোম্পানীটোৰ কৰ্মচাৰী আকাশ সিঙে কয় যে “বহুমহলীয়া অট্টালিকাটোৰ খুঁটাটোত ফাট মেলিছিল। আমি সকলোৱে তললৈ নামি আহিলোঁ। বৰষুণ দি আছিল। হঠাতে গোটেই ঘৰটো ভাঙি পৰিল।” একাংশই দাবী কৰা মতে, ট্ৰাকখনে সামগ্ৰী ভৰোৱা আৰু নমাওঁতে বহুমহলীয়া খুঁটাত খুন্দা মাৰে। খুঁটাটো কেইবাবাৰো ফাটি গ’ল। আৰু সেইবাবেই বহুমহলীয়া গঠনটো দুৰ্বল হৈ পৰে। তাৰ বাবেই ই ভাঙি পৰিল।