ৱিকিমিডিয়া ‘ট্ৰেইন দ্য ট্ৰেইনাৰ’ অনুষ্ঠান : অসমৰ পৰা ড° গীতাৰ্থ বৰদলৈ আৰু প্ৰাণজ্যোতি নাথৰ অংশগ্ৰহণ

ভাৰতৰ বিভিন্ন ভাষাৰ ৱিকিপিডিয়া পৰিয়ালসমূহক শক্তিশালী কৰাৰ উদ্দেশ্যে তথা নিষ্ঠাবান ৱিকি কৰ্মীসকলক একোজন গুৰিধৰোঁতালৈ ৰূপান্তৰ কৰিবৰ নিমিত্তে বেংগালুৰু স্থিত চিআইএছ-এটুকে নামৰ সংস্থাটোৱে ২০১৩ চনৰপৰা ৱিকিমিডিয়া ‘ট্ৰেইন দ্য ট্ৰেইনাৰ’ অনুষ্ঠানটোৰ আয়োজন কৰি আহিছে।

এই অনুষ্ঠানটো হৈছে এখন দুদিনীয়া কৰ্মশালা য’ত বিভিন্ন ভাষাৰ ৱিকিপিডিয়ানসকলক নিজৰ ভাষাৰ ৱিকিক শক্তিশালী কৰিবলৈ বিভিন্ন প্ৰশিক্ষণ দিয়া হয়। প্ৰশিক্ষণ কালৰ সমুদায় খৰছ বহন কৰে ৱিকিমিডিয়া ফাউণ্ডেচনে। প্ৰতি ভাষাৰ দুজনকৈ ৱিকিমিডিয়ানলৈ জলপানি আগবঢ়োৱা হয়, য’ত অহা-যোৱা, খোৱা-থকা, ফুৰা-চকা সম্পূৰ্ণ বিনামূলীয়া হয়।

২০২৪ চনত চিআইএছ-এটুকেক ‘ট্ৰেইন দ্য ট্ৰেইনাৰ’ৰ নৱমটো কৰ্মশালা আয়োজন কৰিবলৈ ওড়িয়া ৱিকিমিডিয়ান পৰিয়ালে সহায় কৰে। চিআইএছৰ তৰফৰপৰা তনৱীৰ হাছান, পৱন সন্তোষ, নিতেশ গীল, নিৱাস ৰামিচেট্টি, সুবোধ কুলকাৰ্ণি, মেদিনী চুভু আৰু ক্ৰিষ্টিনা তথা ওড়িয়া ৱিকিমিডিয়ান সম্প্ৰদায়ৰপৰা জ্ঞানৰঞ্জন চাহু, মৃত্যুঞ্জয় কৰ, চিন্ময়ী মিশ্ৰ, সংগ্ৰাম কেশৰী সেনাপতি, গায়ত্ৰী ত্ৰিপাঠী, শৈলেশ পাটনায়ক আৰু অভিজিৎ পাত্ৰই আঁত ধৰা কৰ্মশালাখনত প্ৰায় ১৫ টা ভাৰতীয় ভাষাৰ ত্ৰিশ জন ৱিকিমিডিয়ানে ভাগ লয় আৰু ৱিকিপিডিয়াৰ বিভিন্ন ভগ্নী প্ৰকল্প ৱিকি কমনচ্‌, ৱিকিউৎস, ৱিকিডাটা আদিৰ বিষয়ে আলোচনা কৰে।

১৮ অক্টোবৰত উৰিষ্যাৰ ‘কলাভূমি’ সংগ্ৰহালয় ভ্ৰমণেৰে আৰম্ভ হৈ ২০ অক্টোবৰ তাৰিখে সম্প্ৰীতিমূলক নৈশ ভোজেৰে শেষ হোৱা এই অনুষ্ঠানত ভাগ লবলৈ অসমৰ পৰা ড°গীতাৰ্থ বৰদলৈ আৰু প্ৰাণজ্যোতি নাথে বৃত্তি লাভ কৰিছিল।