কমলা হেৰিছ কিয় পৰাজিত হ’ল? কাৰণ দৰ্শাই ব্যাখ্যা কৰিলে কংগনা ৰাণাওটে

আমেৰিকাৰ ৰাষ্ট্ৰপতিৰ নিৰ্বাচনত পুনৰ এবাৰ জয়ী হ’ল ড’নাল্ড ট্ৰাম্প। বহু কেলেংকাৰীৰ মহানায়ক ড’নাল্ড ট্ৰাম্পৰ বিজয়ত উৎফুল্লিত বিজেপি। ভোটৰ ফলাফল দিয়াৰ আগতেই ট্ৰাম্পৰ প্ৰশংসাত পঞ্চমুখ বিজেপি সাংসদ কংগনা ৰাণাওট।

মাণ্ডীৰ বিজেপি সাংসদ কংগনাই তেওঁৰ ইনষ্টাগ্ৰাম ষ্ট’ৰীত ট্ৰাম্পক ‘টোটেল কিলাৰ’ বুলি অভিহিত কৰিছে। লগতে জনাইছে যে কমলা হেৰিছৰ পৰাজয়ৰ কাৰণো তেওঁ বুজি পাইছে।

উল্লেখ্য যে চলিত বৰ্ষৰ জুলাই মাহত পেনচিলভেনিয়াৰ বাটলাৰত ট্ৰাম্পে এখন নিৰ্বাচনী সভা অনুষ্ঠিত কৰিছিল। সেই সভাত হঠাতে বন্দুকধাৰীয়ে ট্ৰাম্পক আক্ৰমণ কৰে। ট্ৰাম্পৰ কাণত চুই পাৰ হৈ গৈছিল বন্দুকৰ গুলী।

সেই সময়ৰ এখন ছবি নিজৰ ইনষ্টাগ্ৰাম ষ্ট’ৰীত শ্বেয়াৰ কৰি কংগনাই লিখিছে, ‘মই যদি আমেৰিকান হ’লোহেঁতেন তেন্তে এই ‘শ্বট মেন’জনক ভোট দিলোঁহেঁতেন, যিয়ে থিয় হৈ নিজৰ ভাষণ সম্পূৰ্ণ কৰিছিল।’

ক’বলৈ গ’লে আমেৰিকাৰ নিৰ্বাচনৰ গণনা সম্পূৰ্ণ হোৱাৰ আগতেই ৰিপাব্লিকান দলৰ প্ৰাৰ্থী ট্ৰাম্পৰ জয় নিশ্চিত হৈছিল। আনকি ফ্ল’ৰিডাৰ পাম বিচতো তেওঁ বিজয় ভাষণ প্ৰদান কৰে।

কিন্তু কমলা হেৰিছ পৰাজয় হোৱা সম্পৰ্কে কি ক’লে কংগনাই?  ছচিয়েল মিডিয়াৰ জৰিয়তে ইয়াৰ কাৰণ উল্লেখ কৰিছে কংগনাই। ডেম’ক্ৰেট প্ৰাৰ্থী কমলা হেৰিছৰ ভোট হ্ৰাস পোৱাৰ বাবে জৰ্জ ক্লুনী, ৰবাৰ্ট ডি নিৰো, বিয়ন্সে, বিলি আইলিছ, টেইলৰ চুইফটৰ দৰে তাৰকাক দোষাৰোপ কৰিছে কংগনাই।

কমলাৰ সৈতে তেওঁলোকৰ ছবি শ্বেয়াৰ কৰি কংগকনাই লিখিছে, “আপুনি জানেনে কমলাৰ ৰেটিং কিয় ইমান সোনকালে হ্ৰাস পালে? এই ব্যক্তি সকলে যেতিয়া তেওঁক সমৰ্থন কৰিছিল, তেতিয়া মানুহে ভাবিছিল যে তেওঁ এই সকলো মানুহৰ লগত আছে। তেওঁলোক একেবাৰেই বিশ্বাসযোগ্য নহয়।”