তিনিচুকীয়াত সংঘটিত ভয়ংকৰ পথ দুৰ্ঘটনাত নিহত ৪ জন; গুৰুতৰভাৱে আহত দুজন

মঙলবাৰে পুৱাই তিনিচুকীয়া-ডিব্ৰুগড় বাইপাছত সংঘটিত এক ভয়ংকৰ পথ দুৰ্ঘটনাত চাৰিজন লোকৰ মৃত্যু হয়।

শিশুসহ ছয়জন লোক কঢ়িয়াই অনা চুইফট ডিজাইৰ (নম্বৰ AS06AA2583)গাড়ী এখনে নিয়ন্ত্ৰণ হেৰুৱাই নিৰ্মাণৰত কালভাৰ্টত খুন্দা মৰাৰ ফলত চাৰিজন যাত্ৰীৰ থিতাতে মৃত্যু হয়।

আজি পুৱা ডিব্ৰুগড় বাণীপুৰ ৰেলৱে ষ্টেচনৰ পৰা তিনিচুকীয়াৰ বৰডুবিলৈ গৈ থকা অৱস্থাত ডিব্ৰুগড়-তিনচুকীয়া বাইপাছৰ পানীতোলাৰ সমীপত সংঘটিত হয় এই দুৰ্ঘটনা।

লগতে পঢ়কঃ ১০ বছৰত দেশত পথ দুৰ্ঘটনাত মৃত্যু হৈছে ১৫.৩ লাখ লোকৰ; পূৰ্বৰ দশকৰ তুলনাত ৩ লাখ অধিক

খবৰ অনুসৰি গাড়ীখনত আছিল এটা পৰিয়ালৰ ছয়জন সদস্য। তেওঁলোকে তিনিচুকীয়াত বিয়াত অংশগ্ৰহণ কৰিবলৈ বিহাৰৰ পৰা আহিছিল।

আৰক্ষীয়ে জনোৱা মতে, গুৰুতৰভাৱে আহত পৰিয়ালৰ আন দুজন সদস্যক চিকিৎসাৰ বাবে ডিব্ৰুগড়ৰ অসম চিকিৎসা মহাবিদ্যালয়লৈ প্ৰেৰণ কৰা হয়।

স্থানীয় ৰাইজে উদ্ধাৰ অভিযান আৰম্ভ কৰি আহতসকলক সহায় কৰাৰ লগতে তেওঁলোকক চিকিৎসালয়লৈ প্ৰেৰণ কৰে।

লগতে পঢ়কঃ কেনেকৈ? ট্ৰাম্পৰ হাতত পৰাস্ত হৈও আমেৰিকাৰ প্ৰথমগৰাকী মহিলা ৰাষ্ট্ৰপতি হ’ব পাৰে কমলা হেৰিছ!

জানিব পৰা মতে, ঘটনাত নিহতকেইজনৰ বয়স ৪০ৰ পৰা ৪৫ বছৰৰ ভিতৰত হ’ব।