১০৮ মৃত্যুঞ্জয় কৰ্মচাৰীৰ দাবী পূৰণ কৰিবলৈ চৰকাৰক আপৰ আহ্বান : ঋণ লৈ হিতাধিকাৰী আঁচনি ৰূপায়ন কৰা চৰকাৰৰ দিনতে অচল ১০৮ সেৱা- ৰাজীৱ শইকীয়া

ৰাজ্যৰ ১০৮ মৃত্যুঞ্জয় সেৱাৰ কৰ্মচাৰীৰ ন্যায্য প্ৰাপ্যৰ দাবীৰ আন্দোলনৰ প্ৰতি সমৰ্থন ব্যক্ত কৰিছে আম আদমী পাৰ্টিয়ে। আজি আপৰ ৰাজ্যিক সাধাৰণ সম্পাদক (সাংগঠনিক) ৰাজীৱ শইকীয়াই এক প্ৰেছ বিজ্ঞপ্তি যোগে এম্বুলেঞ্চ সেৱাৰ সৈতে জড়িত এই কৰ্মচাৰী সকলৰ সমস্যা সমাধানৰ ক্ষেত্ৰত মুখ্যমন্ত্ৰী হিমন্ত বিশ্ব শৰ্মাৰ হস্তক্ষেপ কামনা কৰে।

আপৰ সাধাৰণ সম্পাদক ৰাজীৱ শইকীয়াই কয়, ” যিখন চৰকাৰে মাহে মাহে হাজাৰ হাজাৰ কোটি টকাৰ ঋণ লৈ বিভিন্নধৰণৰ হিতাধিকাৰী আঁচনি ৰূপায়ন কৰিছে, সেইখন চৰকাৰে চৰকাৰী খণ্ডত এম্বুলেঞ্চ সেৱা সুকলমে চলাব পৰা নাই। এয়া লজ্জাজনক কথা। আমি আম আদমী পাৰ্টিৰ পক্ষৰ পৰা মুখ্যমন্ত্ৰী হিমন্ত বিশ্ব শৰ্মাক ১০৮ মৃত্যুঞ্জয় সেৱা যাতে বন্ধ নহয় তাৰ বাবে প্ৰয়োজনীয় ব্যৱস্থা গ্ৰহণ কৰিবলৈ দাবী জনাওঁ । চৰকাৰলৈ আমাৰ প্ৰশ্ন- এম্বুলেঞ্চৰ টায়াৰ ৰিপেয়াৰিং কৰিব নোৱৰা বা তেল ভৰাব নোৱৰা চৰকাৰে নাগৰিকৰ স্বাস্থ্যৰ অধিকাৰ কিদৰে সুনিশ্চিত কৰিব?

ঋণৰ পুঁজিৰে অনাহকত বিভিন্ন আঁচনি মুকলি কৰা চৰকাৰে স্বাস্থ্য সেৱাৰ দৰে গুৰুত্বপূৰ্ণ বিষয়ত উদাসীনতা প্ৰদৰ্শন কৰাটো কল্যাণকামী চৰকাৰৰ বাবে চৰম দায়িত্বহীনতাৰ পৰিচায়ক। তদুপৰি মৃত্যুঞ্জয় সেৱাৰ সৈতে জড়িত কৰ্মচাৰীৰ চাকৰি নিয়মীয়াকৰণৰ দাবীও চৰকাৰে পূৰণ কৰা উচিত। ” উল্লেখ্য যে ৰাজ্যখনত পূৰ্বৰ কংগ্ৰেছ চৰকাৰৰ আমোলতে আৰম্ভ হোৱা ১০৮ মৃত্যুঞ্জয় সেৱা বৰ্তমান বগা হাতীত পৰিণত হৈছে। প্ৰায় ২০০ খন এম্বুলেঞ্চ প্ৰয়োজনীয় কৰ্মচাৰী আৰু পুঁজিৰ যোগান লাভ নকৰাৰ বাবে অচলাৱস্থাৰ সৃষ্টি হৈছে। এনে অৱস্থাৰ পৰা উদ্ধাৰৰ বাট বিচাৰি কৰ্মচাৰী সকলে প্ৰতিবাদৰ পথ গ্ৰহণ কৰিছে। আপৰ সাধাৰণ সম্পাদক ৰাজীৱ শইকীয়াই চৰকাৰৰ সংশ্লিষ্ট বিভাগক ১০৮ মৃত্যুঞ্জয় সেৱাৰ কৰ্মচাৰী সকলৰ বুজ লৈ শীঘ্ৰেই সমস্যা সমাধান কৰিবলৈ আহ্বান জনাইছে।