মেঘালয়ৰ হাইস্কুল শিক্ষান্ত পৰীক্ষাৰ ফলাফলত তুৰাৰ শ্বেৰউড স্কুলৰ জয় যাত্ৰা

মেঘালয় ব’ৰ্ড অফ স্কুল এডুকেশ্যনৰ অধীনত অনুষ্ঠিত হাইস্কুল শিক্ষান্ত পৰীক্ষাৰ বা দশম শ্ৰেণীৰ ফলাফল আৰু উচ্চতৰ মাধ্যমিক শিক্ষান্ত পৰীক্ষা বা দ্বাদশ শ্ৰেণীৰ কলা শাখাৰ চূড়ান্ত পৰীক্ষাৰ ফলাফল আজি ঘোষণা কৰা হৈছে।

মেঘালয় ব’ৰ্ড অফ স্কুল এডুকেশ্যনৰ অধীনৰ হাইস্কুল শিক্ষান্ত পৰীক্ষা আৰু উচ্চতৰ মাধ্যমিক শিক্ষান্ত পৰীক্ষাৰ ফলাফল ইয়াৰ নিজা ৱেবছাইট – megresults.nic.in ঘোষণা কৰা হৈছে।

হাইস্কুল শিক্ষান্ত পৰীক্ষাত মুঠ ৫০০৭৭ গৰাকী ছাত্ৰ-ছাত্ৰীৰ ভিতৰত ২৮৪২৪ গৰাকী ছাত্ৰ-ছাত্ৰী উত্তীৰ্ণ হৈছে। উত্তীৰ্ণৰ হাৰ হৈছে শতকৰা ৫৬.৭৬ শতাংশ।

এই পৰীক্ষাত প্ৰথম তিনিটা স্থান লাভ কৰিছে গাৰো পাহাৰৰ তুৰাৰ শ্বেৰউড বিদ্যালয়ৰ শিক্ষাৰ্থীয়ে।

তুৰাৰ শ্বেৰউড বিদ্যালয়ৰ শিক্ষাৰ্থী অনুৰাগ তিৱাৰীয়ে মুঠ ৬০০ নম্বৰৰ ভিতৰত ৫৮১ নম্বৰ লাভ কৰি প্ৰথম স্থান লাভ কৰিছে।

একেখন বিদ্যালয়ৰে তৃষা শীল শৰ্মাই ৫৭৩ নম্বৰেৰে দ্বিতীয় স্থান আৰু যশ খাণ্ডেলাৱালে ৫৬৯ নম্বৰ লাভ কৰি তৃতীয় স্থান লাভ কৰিছে।

আনহাতে, উচ্চতৰ মাধ্যমিক শিক্ষান্ত পৰীক্ষাৰ কলা শাখাত অৱতীৰ্ণ হোৱা মুঠ ২৩১৬০ গৰাকী পৰীক্ষাৰ্থীৰ ভিতৰত ১৭৩১৮ গৰাকী পৰীক্ষাৰ্থী উত্তীৰ্ণ হৈছে। উত্তীৰ্ণৰ হাৰ ৭৪.৭৮ শতাংশ।

শ্বিলঙৰ ছেইন্ট এন্থনি হায়াৰ ছেকেণ্ডাৰী স্কুলৰ শিক্ষাৰ্থী লিলি খাৰথাংমৱে সৰ্বমুঠ ৪৪০ নম্বৰ লাভ কৰি প্ৰথম স্থান অধিকাৰ কৰিছে।

মুঠ ৪৩৯ নম্বৰেৰে দ্বিতীয় স্থান লাভ কৰিছে ছেইন্ট মাৰ্গাৰেট হায়াৰ ছেকেণ্ডাৰী স্কুলৰ ছুছানা খাৰমাৱসুন নামৰ শিক্ষাৰ্থীগৰাকীয়ে।

আনহাতে শ্বিলঙৰ ছেইন্ট এন্থনি হায়াৰ ছেকেণ্ডাৰী স্কুলৰ শিক্ষাৰ্থী বৃন্দা গেৱালিয়ে ৪৩৬ নম্বৰ লাভ কৰি তৃতীয় স্থান লাভ কৰে।