ৰাজ্যত এইচ আই ভিৰ ভয়াবহতা : আপৰ ৰাজ্যিক সভাপতি মনোজ ধানোৱাৰৰ প্ৰতিক্ৰিয়া

ৰাজ্যৰ স্বাস্থ্য বিভাগে ধুবুৰী জিলাত এইচ আই ভি পজিটিভ ৰোগীৰ সংখ্যা বৃদ্ধিৰ বাবে জিলাখনক ৰেড জ’ন হিচাপে তালিকাভুক্ত কৰা সন্দৰ্ভত প্ৰতিক্ৰিয়া ব্যক্ত কৰিছে আপৰ ৰাজ্যিক সভাপতি মনোজ ধানোৱাৰে ।

সোমবাৰে ধানোৱাৰে এক প্ৰেছ বিজ্ঞপ্তি যোগে ৰাজ্যত মাৰাত্মক এইচ আই ভিৰ ভয়াবহতাৰ সন্দৰ্ভত নিজৰ প্ৰতিক্ৰিয়া প্ৰকাশ কৰে। আপৰ নেতাগৰাকীয়ে কয়, “বিগত ১০ মাহত তিনিশতকৈ অধিক স্কুল – কলেজৰ ছাত্ৰ – ছাত্ৰী এইচ আই ভি পজিটিভ আক্ৰান্ত হোৱাৰ চৰকাৰী তথ্যই ভৱিষ্যত প্ৰজন্মৰ বাবে এক অশনি সংকেত কঢ়িয়াই আনিছে। বিশেষকৈ তৰুণ প্ৰজন্মৰ ড্ৰাগছ আসক্ত সকলৰ মাজত এই লক্ষণ ধৰা পৰিছে। এই ভয়াবহ পৰিস্হিতিৰ পৰা আমাৰ উঠি অহা প্ৰজন্মক ৰক্ষা কৰাৰ দায়িত্ব সকলোৱে পালন কৰিব লাগিব।

আমি চৰকাৰৰ স্বাস্থ্য বিভাগৰ লগতে অসম ৰাজ্যিক এইডছ নিয়ন্ত্ৰণ সমিতিক এই ক্ষেত্ৰত তৎপৰতাৰে আগবাঢ়িবলৈ আহ্বান জনাইছোঁ। নাগৰিক সমিতি, স্বেচ্ছাসেৱী সংস্থা তথা সমাজৰ নেতৃত্ব স্থানীয় লোকসকলে ড্ৰাগছ সেৱনৰ পৰিণতি সন্দৰ্ভত ব্যাপক সজাগতামূলক অভিযান আৰম্ভ কৰা উচিত।

যিহেতু একে চিৰিঞ্জৰ জৰিয়তে বহুকেইজনে ড্ৰাগছ লোৱাৰ ফলতে এইচ আই ভি পজিটিভ এনে ভয়াবহ ৰূপে বৃদ্ধি পাইছে, গতিকে এই ক্ষেত্ৰত সজাগতামূলক অভিযানৰ উপৰি চৰকাৰে অবৈধ ড্ৰাগছৰ চোৰাং বেহা কঠোৰ হাতেৰে দমন কৰিব লাগিব।

অন্যথাই আজি ধুবুৰী জিলাক চৰকাৰে ৰেড জ’ন ঘোষণা কৰিছে, কাইলৈ আন জিলা সমূহতো একেই পৰিস্থিতিৰ সৃষ্টি হ’ব। ” আপৰ ৰাজ্যিক সভাপতি গৰাকীয়ে কয়,” এই ক্ষেত্ৰত ৰাজ্যৰ স্বাস্থ্য বিভাগ আৰু অসম ৰাজ্যিক এইডছ নিয়ন্ত্ৰণ সমিতিৰ দায়িত্ব সকলোতকৈ বেছি। কিয়নো মাথোঁ এখন জিলাতে নহয়, সমগ্ৰ ৰাজ্যতে ১,৩১৭ জন এইচ আই ভি পজিটিভ চিনাক্ত হোৱাটো ৰাজ্যৰ স্বাস্থ্যখণ্ডৰ বাবে এক প্ৰত্যাহবান হিচাপে পৰিগণিত হৈছে।”