পঞ্চায়ত নিৰ্বাচনত সকলো বিৰোধী দলক একত্ৰিত হ’বলৈ আহ্বান অখিল গগৈৰ

ভাৰতীয় জনতা পাৰ্টিক পৰাস্ত কৰাৰ স্বাৰ্থত সকলো বিৰোধী দলকে মিত্ৰতা কৰি পঞ্চায়ত নিৰ্বাচনত অৱত্তীৰ্ণ হ’বলৈ আহ্বান জনাইছে ৰাইজৰ দলৰ বিধায়ক অখিল গগৈয়ে।

সংবাদ মাধ্যমৰ সৈতে হোৱা এক সাক্ষাৎকাৰত অখিল গগৈয়ে কয় যে আগন্তুক পঞ্চায়ত নিৰ্বাচন হ’ব ২০২৬ চনৰ বিধানসভা নিৰ্বাচনৰ পৰীক্ষা।

‘‘আমি অনুভৱ কৰোঁ যে কংগ্ৰেছকে ধৰি ১৬টা বিৰোধী দলে যদি পঞ্চায়ত নিৰ্বাচনত হাত মিলাই তেতিয়া বিজেপি নিশ্চয় পৰাস্ত হ’ব।” – গগৈয়ে কয়।

গগৈয়ে উল্লেখ কৰে যে মিত্ৰতা অবিহনে বিজেপিক পৰাস্ত কৰা সম্ভৱ নহ’ব। মিত্ৰতা নকৰিলে আকৌ এবাৰ ভোট বিভাজন হ’ব।

তেওঁ দাবী কৰে যে কংগ্ৰেছেহে মিত্ৰতাৰ ওপৰত গুৰুত্ব দিব লাগিব।

”আগন্তুক নিৰ্বাচনত যাতে কোনো ধৰণৰ সংঘৰ্ষ বা সমস্যাৰ সৃষ্টি নহয় তাৰ বাবে কংগ্ৰেছে মিত্ৰতা চূড়ান্ত কৰক। যোৱা উপ-নিৰ্বাচন কংগ্ৰেছে অকলে খেলাৰ সিদ্ধান্ত লৈছিল আৰু শেষত তাৰ কুফল লাভ কৰিলে,” তেওঁ কয়।

তেওঁ লগতে কয়, “মই কংগ্ৰেছক আবেদন জনাইছো যে যদি তেওঁলোকে সঁচাকৈয়ে ২০২৬ চনত বিজেপিক পৰাস্ত কৰিব বিচাৰে তেন্তে তেওঁলোকে মিত্ৰতাত যোগদান কৰক।”অসমৰ মুখ্যমন্ত্রী হিমন্ত বিশ্ব শর্মক লক্ষ্য কৰি অখিল গগৈয়ে কয় যে হিমন্ত বিশ্ব শর্মাৰ হাতত ক্ষমতা থকালৈকে অসম আগবাঢ়িব নোৱাৰে আৰু জনসাধাৰণৰ উন্নতি হ’ব নোৱাৰে৷