বাক স্বাধীনতাৰ অৰ্থ কি সেয়া আৰক্ষীয়ে অন্তত বুজিব লাগেঃ উচ্চতম ন্যায়ালয়

দেশত সংবিধান গৃহীত হোৱাৰ ৭৫ বছৰ পাৰ হৈ গ’ল৷ বাক স্বাধীনতাৰ অৰ্থ কি সেয়া আৰক্ষীয়ে বুজিব লাগে, উচ্চতম ন্যায়ালয়ে কংগ্ৰেছ ৰাজ্যসভাৰ সাংসদ ইমৰাণ প্ৰতাপগড়ীৰ বিৰুদ্ধে এক গোচৰত সোমবাৰে এই দৰে মন্তব্য প্ৰদান কৰে।

প্ৰকাশিত খবৰ অনুসৰি কংগ্ৰেছৰ এগৰাকী সাংসদে ছ’চিয়েল মিডিয়াত এটা ভিডিঅ প্ৰকাশ কৰিছিল। ভিডিঅ’টোৰ আৰম্ভণিতে কবিতা পাঠ কৰা দেখা গৈছিল। ইয়াৰ পাছতে কবিতাটোক লৈ বিতৰ্ক আৰম্ভ হৈছিল আৰু ধৰ্মীয় আৱেগক আঘাত কৰা আৰু সাম্প্ৰদায়িক বিষবাস্প বিয়পোৱাৰ অভিযোগত সাংসদগৰাকীৰ বিৰুদ্ধে গুজৰাট আৰক্ষীয়ে এফআইআৰ ৰুজু কৰিছিল। কংগ্ৰেছৰ সাংসদগৰাকীয়ে এফআইআৰ খাৰিজ কৰাৰ দাবীত গোচৰ তৰে। সোমবাৰে এই গোচৰৰ শুনানি গ্ৰহণ কৰি উচ্চতম ন্যায়ালয়ে ৰায়দান স্থগিত ৰাখে।

সোমবাৰে উচ্চতম ন্যায়ালয়ৰ ন্যায়াধীশ অভয় এছ ওকা আৰু ন্যায়াধীশ উজ্জ্বল ভূঞাৰ বিচাৰপীঠে মৌখিক পৰ্যবেক্ষণত কবিতাটোৰ দেশ বিৰোধী কাৰ্যকলাপৰ লগত কোনো সম্পৰ্ক নাই বুলি উল্লেখ কৰে। আৰক্ষীয়ে কবিতাটো পঢ়ি তাৰ অৰ্থ কি বুজিব লাগে।

কবিতাটোত আচলতে অহিংসাৰ কথা কোৱা হৈছে বুলি উচ্চতম ন্যায়ালয়ে প্ৰকাশ কৰিছে। ন্যায়াধীশ ওকাই এফআইআৰ পঞ্জীয়নৰ ক্ষেত্ৰত আৰক্ষীৰ সংবেদনশীলতাৰ অভাৱ বুলি উল্লেখ কৰে। গুজৰাট চৰকাৰক প্ৰতিনিধিত্ব কৰি ছলিচিটৰ জেনেৰেল তুষাৰ মেহতাই আদালতত কয় যে বহু লোকে হয়তো কবিতাটোৰ অৰ্থ ভুলকৈ বুজি পাইছে।