পত্নীয়ে পৰপুৰুষৰ লগত মোবাইলত অশ্লীল কথা পতাটো স্বামীৰ প্ৰতি মানসিক নিষ্ঠুৰতা : উচ্চ ন্যায়ালয়

নিজৰ মনৰ আনন্দৰ বাবে পৰপুৰুষৰ লগত মোবাইলত অশ্লীল কথা-বতৰা পতাটো স্বামীৰ প্ৰতি মানসিক নিষ্ঠুৰতা প্ৰকাশৰ সমান। এই মন্তব্য মধ্যপ্ৰদেশ উচ্চ ন্যায়ালয়ৰ বিচাৰপীঠৰ। ৰায়দানত এই মন্তব্য প্ৰকাশ কৰি এক বিবাহ বিচ্ছেদৰ সপক্ষে স্বাক্ষৰ কৰে উচ্চ ন্যায়ালয়ৰ বিচাৰপীঠে।

উল্লেখ্য যে এগৰাকী ব্যক্তিয়ে নিজৰ পত্নীৰ বিৰুদ্ধে অভিযোগ উত্থাপন কৰি বিবাহ বিচ্ছেদৰ বাবে আবেদন কৰিছিল। এই বিবাহ বিচ্ছেদ নিম্ন আদালতে মঞ্জুৰ কৰিছিল কৰিছিল যদিও ব্যক্তিজনৰ পত্নীয়ে নিম্ন আদালতক প্ৰত্যহ্বান জনাই উচ্চ ন্যায়ালয়ৰ দাৰস্থ হয়।

কিন্তু উচ্চ ন্যায়ালয়েও নিম্ন আদালতৰ ৰায়ক সমৰ্থন কৰি বিবাহ বিচ্ছেদৰ সপক্ষে ৰায় দান কৰে।

উচ্চ ন্যায়ালয়ৰ ন্যায়াধীশ বিবেক ৰুছিয়া আৰু ন্যায়াধীশ গজেন্দ্ৰ সিঙৰ ইন্দোৰৰ বিচাৰপীঠে কয় যে কোনো স্বামীয়েই আন পুৰুষৰ সৈতে পত্নীৰ লেতেৰা কথোপ-কথন মানি ল’ব নোৱাৰে।

আদালতে লগতে কয় যে বিবাহৰ পিছত স্বামী বা পত্নীৰ সকলোৰে আন বন্ধুৰ লগত মোবাইল ফোনত যোগাযোগ কৰাৰ সম্পূৰ্ণ অধিকাৰ আছে। পতি-পত্নীয়ে বন্ধু-বান্ধৱীৰ লগত মুক্তভাৱে কথা পতা, ফটো আদান-প্ৰদান, মেছেজ ফৰৱাৰ্ড কৰাত কোনো নিষেধাজ্ঞা নাই। কিন্তু, তাৰ ভিতৰতো এক নিৰ্দিষ্ট ভদ্ৰতা আৰু বিনয় বজাই ৰখাটো অতি প্ৰয়োজনীয়। কোনো স্বামী বা পত্নীয়ে এনে আপত্তিজনক কাম কৰা উচিত নহয়।

আদালতে স্পষ্ট কৰি দিয়ে যে যদি পত্নীয়ে স্বামীৰ আপত্তি থকাৰ পিছতো এনে কাম কৰি থাকে তেন্তে ইয়াক মানসিক নিৰ্যাতন বুলি গণ্য কৰা উচিত।

গোচৰৰ সবিশেষ অনুসৰি ২০১৮ চনৰ ডিচেম্বৰ মাহত হিন্দু ৰীতি-নীতি অনুসৰি বিবাহপাশত আবদ্ধ হৈছিল দম্পতীহালে। বেংক মেনেজাৰৰ স্বামীৰ শ্ৰৱণ ক্ষমতা আংশিকভাৱে অক্ষম।

স্বামীয়ে অভিযোগ কৰে যে তেওঁৰ পত্নীয়ে অশ্লীল ভাষা ব্যৱহাৰ কৰি পূৰ্বৰ প্ৰেমিকৰ সৈতে হোৱাটছএপত শাৰীৰিক সম্পৰ্কৰ বিষয়ে আলোচনা কৰে। পূৰ্বৰ যৌন সম্পৰ্কৰ বিষয়েও কথা পাতে। স্বামীয়ে বাধা দিয়াৰ পিছত মহিলাগৰাকীয়ে এনে কথোপকথন অব্যাহত ৰাখে। স্বামীৰ এই অভিযোগ সঁচা বুলি প্ৰমাণিত হোৱাৰ পিছত আদালতে ইয়াক মানসিক নিষ্ঠুৰতা বুলি আখ্যা দি বিবাহ বিচ্ছেদ মঞ্জুৰ কৰে।