উজবেকিস্তানত মেঘালয়ৰ শীৰ্ষ আমোলাৰ মৃত্যু! হোটেলৰ কোঠাৰ পৰা উদ্ধাৰ মৃতদেহ

মেঘালয়ৰ জনস্বাস্থ্য কাৰিকৰী আৰু গড়কপ্তানি বিভাগৰ প্ৰধান সচিব চৈয়দ মহম্মদ এ ৰাজীৰ উজবেকিস্তানত মৃত্যু ঘটে। উজবেকিস্তানৰ বুখাৰা চহৰৰ হোটেলৰ কোঠাৰ পৰা উদ্ধাৰ কৰা হৈছে তেওঁৰ মৃতদেহ।

বাতৰি মতে, আমোলাগৰাকী মধ্য এছিয়াৰ দেশখনলৈ ব্যক্তিগত ভ্ৰমণত গৈছিল। যোৱা ৪ এপ্ৰিলৰ পৰা বুখাৰাত আছিল ৰাজী। মঙলবাৰে চৰকাৰী সূত্ৰ অনুসৰি মহানগৰীখনৰ এখন হোটেলত তেওঁৰ মৃতদেহ উদ্ধাৰ হয়।

ৰাজী ইণ্ডিয়ান ৰে’লৱে ট্ৰেফিক চাৰ্ভিছৰ (আই আৰ টি এছ) বিষয়া আছিল। ২০২১ চনৰ পৰা মেঘালয়ত কৰ্তব্যৰত আছিল আমোলাগৰাকী। সোমবাৰৰ পুৱাৰে পৰা ফোনযোগে যোগাযোগ কৰিব পৰা হোৱা নাছিল।

দীৰ্ঘ সময় ধৰি কোনো সঁহাৰি নোপোৱাৰ পিছত হোটেলৰ কৰ্মচাৰীয়ে তেওঁৰ কোঠাৰ দুৱাৰ ভাঙি প্ৰৱেশ কৰে। সেই সময়ত হোটেলৰ কৰ্মচাৰীয়ে তেওঁৰ মৃতদেহ কোঠাটোত পৰি থকা অৱস্থাত উদ্ধাৰ কৰে।

তেওঁৰ মৃত্যু কেনেকৈ হ’ল সেয়া এতিয়াও স্পষ্ট হোৱা নাই। অৱশ্যে মেঘালয়ৰ আমোলাগৰাকীৰ হৃদৰোগত মৃত্যু হোৱা বুলি অনুমান কৰা হৈছে।

ৰাজীৰ মৃত্যুৰ খবৰ পোৱাৰ পাছতে মেঘালয় চৰকাৰে প্রয়োজনীয় পদক্ষেপ হাতত লৈছে৷ সেই ৰাজ্যৰ মুখ্যমন্ত্রী কনৰাড চাংমাই কয় যে আমোলাগৰাকীৰ পত্নী ইতিমধ্যে বুখাৰালৈ ৰাওনা হৈছে৷

আমোলাগৰাকীৰ মৃত্যুৰ পিছত ছ’চিয়েল মিডিয়াত ছাংমাই লিখিছে, ‘ৰাজীৰ অকাল মৃত্যুত মই গভীৰভাৱে দুখী। মেঘালয়ৰ মুখ্যমন্ত্ৰীগৰাকীয়ে লগতে লিখিছে যে প্ৰতিটো বিভাগতে কামৰ প্ৰতি ৰাজীৰ নিষ্ঠা আছিল। ৰাজীৰ অবিশ্বাস্য দক্ষতাই আনকো অনুপ্ৰাণিত কৰিছিল। ছাংমাই লিখিছে, “তেওঁৰ (ৰাজীৰ) সহকৰ্মীসকলে তেওঁক অপৰিসীম মৰম আৰু সন্মান কৰিছিল।”