ডিজাইনিঙত স্নাতকোত্তৰ ডিগ্ৰী লোৱাৰ মন বাণিজ্য শাখাৰ চতুৰ্থ স্থানপ্ৰাপ্ত ৰাধিকা আগৰৱালাৰ

নগাঁৱৰ গীতাঞ্জলী কনিষ্ঠ মহাবিদ্যালয়ৰ পৰা বাণিজ্য শাখাত ৯২.২ শতাংশৰে চতুৰ্থ স্থান দখল কৰি নগাঁও চহৰৰ হয়বৰগাঁ‌ৱৰ ৰাধিকা আগৰৱালাই সমগ্ৰ নগাঁও জিলাৰ লগতে শিক্ষানুষ্ঠানখনলৈ গৌৰৱ কঢ়িয়াই আনিছে।

হয়বৰগাঁৱৰ ব্যৱসায়ী কিশোৰ আগৰৱালা আৰু তনুজা আগৰৱালাৰ কন্যা ৰাধিকা আগৰৱালাই ভালদৰে অধ্যয়ন কৰিলে ভাল ফলাফল লাভ কৰিব পাৰি বুলি কয়। তেওঁৰ এই ফলাফলৰ আৰত পিতৃ-মাতৃ শিক্ষক-শিক্ষয়ত্ৰী আৰু বন্ধু-বান্ধব তথা পৰিয়ালৰ যথেষ্ট অৰিহণা আছে বুলিও সংবাদ মাধ্যমৰ আগত মন্তব্য কৰে।

ৰাধিকাই ইংৰাজীত ৯১, ঐচিক ইংৰাজীত ৮৫, হিচাব পৰীক্ষাত ৯৬, ব্যৱসায়িক অধ্যয়নত ৯৬, বাণিজ্যিক অংকত ৯৩, বেংকিঙত ৮৯ সহ ৪৬২ নম্বৰ লাভ কৰিবলৈ সক্ষম হয়।

ফেচবুক কৰি ভাল পোৱা ৰাধিকা আগৰৱালাই সকলো ছাত্ৰ-ছাত্ৰীকে ভালদৰে ফেচবুক ব্যৱহাৰ কৰিবলৈ আহ্বান জনায়। আজৰি সময়ত উপন্যাস পঢ়া, টিভি চোৱা আৰু বাতৰি কাকত পঢ়ি ভাল পোৱা ৰাধিকাই সম্প্ৰতি অসমৰ বাহিৰত অধ্যয়ন কৰি ভৱিষ্যতে ডিজাইনিঙত স্নাতকোত্তৰ ডিগ্ৰী লোৱাৰ মন পুহি ৰাখিছে। এই ডিগ্ৰী আহৰণ কৰাৰ পিছত নিজৰ জিলাত এই ক্ষেত্ৰখনৰ প্ৰসাৰৰ ক্ষেত্ৰত কাম কৰিব বুলি জানিবলৈ দিয়ে।

আনহাতে একেখন বিদ্যালয়ৰে পৰা নগাঁও চহৰৰ টেলিয়াপট্টিৰ প্ৰমোদ চেঠীয়া আৰু কবিতা চেঠীয়াৰ কন্যা চিংকী চেঠিয়াই ৯১.৬ শতাংশৰে অষ্টম স্থান দখল কৰিবলৈ সক্ষম হয়।

চিংকীয়ে ইংৰাজীত ৯১, ঐচিক ইংৰাজীত ৯৩ , বাণিজ্যত ৮৯ , ব্যৱসায় অধ্যয়নত ৯৪, বাণিজ্য পৰিসংখ্যাত ৯১, বেংকিঙত ৮৫ সহ ৪৫৮ নম্বৰ লাভ কৰিছে।

ভৱিষ্যতে গুৱাহাটীৰ কোনো শিক্ষানুষ্ঠানত অধ্যয়ন কৰি চাৰ্টাৰ্ড একাউণ্টেণ্ট হোৱাৰ আশা পুহি ৰখা চিংকীয়ে সকলো শিক্ষাৰ্থীকে কঠোৰ অধ্যয়ন কৰিবলৈ আহ্বান জনায়।