পিতৃৰ মৃত্যু বাৰ্ষিকীত পাটাছাৰকুচিত যুৱকে নদীত এৰি দিলে ১০০০ মাছ

বৰপেটা জিলাত পাটাছাৰকুছিৰ এজন যুৱকে প্ৰয়াত পিতৃৰ পঞ্চম মৃত্যু বাৰ্ষিকীত এক অনন্য ৰূপত শ্ৰদ্ধাঞ্জলি জনাই সকলোৰে দৃষ্টি আকৰ্ষণ কৰিছে।

সমাজ সচেতন যুৱক তথা খাদ্য, ৰাজহুৱা বিতৰণ আৰু গ্ৰাহক পৰিক্ৰমা বিভাগৰ জ্যেষ্ঠ পৰিদৰ্শক নিতুল শৰ্মাই প্ৰকৃতিৰ সুৰক্ষাৰ বাবে সদায় পোষকতা কৰা পিতৃৰ প্ৰতি শ্ৰদ্ধাঞ্জলি জনাই ১০ কিলোগ্ৰাম — ৰৌ, ভকুৱা, কমন কাৰ্পৰ প্ৰায় ১০০০ টা পোৱালি — কালদিয়া নদীত মুকলি কৰি দিয়ে।

নদীৰ শিৱ দুৰ্গা ধাম অঞ্চলৰ সমীপৱৰ্তী দুৰ্গা মূৰ্তি বিসৰ্জন ঘাটত মাছকেইটা এৰি দিয়ে। শৰ্মাৰ সৈতে তেওঁৰ পত্নী মুনমী গোস্বামী, ভনীয়েক অৰুন্ধতী দেৱী, ৰিম্পী শৰ্মা, ভতিজী হিমাস্মিতা শৰ্মা, পৰিয়ালৰ বন্ধু ওৱাজ আলীকে ধৰি আত্মীয়-স্বজন উপস্থিত থাকে।

উল্লেখ্য যে, শৰ্মাই এই প্ৰথা অব্যাহত ৰাখি যোৱা বছৰ পিতৃৰ মৃত্যু বাৰ্ষিকীত একেখন নদীতে মাছ এৰি দিছিল।