অধ্যাপক উদয়াদিত্য ভৰালীলৈ এইবৰ্ষৰ পৰাগ কুমাৰ দাস সাংবাদিকতা বঁটা: ১৮ মে’ত প্ৰদান কৰা হ’ব এই সন্মান

বিশিষ্ট চিন্তাবিদ, লেখক, ইতিহাসবিদ, অধ্যাপক উদয়াদিত্য ভৰালীলৈ আগবঢ়োৱা হৈছে এইবৰ্ষৰ পৰাগ কুমাৰ দাস সাংবাদিকতা বঁটা ৷ ১৮ মে’ দেওবাৰে দিনৰ ১১:৩০ বজাত প্ৰদান কৰা হ’ব সন্মান৷

কটন মহাবিদ্যালয়ৰ অৱসৰপ্ৰাপ্ত অধ্যক্ষ উদয়াদিত্য ভৰালীয়ে দীৰ্ঘদিন ধৰি অসমৰ কেইবাখনো আগশাৰীৰ বাতৰি কাকতত নিয়মীয়াকৈ লেখা মেলা কৰি আহিছে ৷ অসমৰ অন্যতম কাকত অসমীয়া প্ৰতিদিনৰ আৰম্ভণিতে “পৃষ্ঠভূমিৰ চিনাকি” শিৰোনামাৰে বিভিন্ন দেশৰ বিষয়ে লিখি আলোড়নৰ সৃষ্টি কৰিছিল। তাৰ পৰৱৰ্তী কালত অসমীয়া প্ৰতিদিনতে “প্ৰাসংগিক পাণ্ডুলিপি ” শিৰোনামাৰে জাতীয় জীৱনৰ বহু গুৰুত্বপূৰ্ণ বিষয় যুক্তিনিষ্ঠ বিশ্লেষণেৰে চিন্তাৰ নতুন বাট মোকলাইছিল ৷

উল্লেখযোগ্য যে, পৰাগ কুমাৰ দাসৰ মৃত্যুৰ পাছত তেওঁৰ স্মৃতিত বিগত ২৫ বছৰ ধৰি আয়োজন কৰা তৰ্ক প্ৰতিযোগিতাৰ ভৰালী আছিল এগৰাকী অন্যতম গুৰি ধৰোঁতা ৷ পৰাগ কুমাৰ দাস সম্পাদিত “বুধবাৰ ” আৰু “আগান”টো নিয়মীয়াকৈ প্ৰবন্ধ লিখি জাতীয় জীৱনলৈ গুৰুত্বপূৰ্ণ বৰঙনি আগবঢ়াইছিল অধ্যাপক উদয়াদিত্য ভৰালীয়ে ৷ এইবাৰ ডঃ হীৰেণ গোহাঁইৰ দ্বাৰা উদয়াদিত্য ভৰালীক তেখেতৰ বাসগৃহত ১৮ মে’ দেওবাৰে পৰাগ কুমাৰ দাস সাংবাদিকতা বঁটা প্ৰদান কৰা হ’ব ৷ স্বাস্থ্যজনিত কাৰণত ১৭ মে’ত পৰাগ কুমাৰ দাসৰ স্মৃতি দিৱসত প্ৰদান কৰিব লগীয়া বঁটাটো ১৮ মে’ দেওবাৰে দিনৰ ১১:৩০ বজাত প্ৰদান কৰা হ’ব বুলি জানিব পৰা গৈছে ৷