অসম চৰকাৰৰ অমানুষিক উচ্ছেদৰ তীব্ৰ বিৰোধ ‘অসম সন্মিলিত নাগৰিক অভিৱৰ্তনৰ’

অসম সন্মিলিত নাগৰিক অভিৱৰ্তনৰ আহ্বায়কসকলে অসমৰ বিজেপি চৰকাৰক ধুবুৰী জিলাৰ চাপৰ ৰাজহ চক্ৰৰ হেজাৰতকৈ অধিক কৃষিজীৱি আৰু শ্ৰমজীৱি মানুহক দীৰ্ঘকাল ধৰি বসবাস কৰি অহা ঠাইৰ পৰা অমানুষিক বৰ্বৰতা আৰু নিষ্ঠুৰতাৰে উচ্ছেদ কৰা কাৰ্যৰ কঠোৰ ভাষাৰে ধিক্কাৰ দিছে। নিৰীহ ৰাইজৰ ওপৰত এনে অত্যাচাৰ অস্বাভাৱিক আৰু বিকৃত মনৰ পৰিচায়ক। বিজেপি চৰকাৰৰ এনে অত‍্যাচাৰৰ কোন কেতিয়া বলি হয় তাৰ একো ঠিকনা নাই। চৰকাৰৰ ভাষ্য অনুসৰি মানুহখিনি ‘বেদখলকাৰী। কিন্তু ঔপনিৱেশিক যুগৰ পৰাই শাসকশ্ৰেণীৰ মাটিৰ প্ৰতি মনোভাৱ শোষণধৰ্মী।

যদিও মাটিৰ পোনপটীয়া উপযোগিতা হৈছে নাগৰিক তথা প্ৰজাবৃন্দৰ বসবাস, কৃষি আৰু আন উৎপাদনমুখী জীৱিকা, কিন্তু চৰকাৰ বাবে ই কেৱল ধন লাভৰ উপকৰণ। ঔপনিৱেশিক যুগৰ পৰা আজিলৈকে চৰকাৰে ভূমিহীন থলুৱা আৰু অন্যান্য বৈধ বাসিন্দাক পট্টা দি সংস্থাপন কৰাত সমূলি মনোনিৱেশ কৰা নাই। কিন্তু অন্যান্য দলৰ চৰকাৰবোৰে অন্ততঃ মানৱীয় সহমৰ্মিতাৰে চৰকাৰী মাটিত বহি থকা লোকসকলক শান্তিত থাকিবলৈ দিছিল। কিন্তু বিজেপি চৰকাৰে হৃদয়হীন জমিদাৰৰ দৰে এই নাগৰিকসকলক উৎখাত কৰিছে।

এওঁলোকে দেশ-বিদেশৰ বৃহৎ পুঁজিপতিক অসমৰ থলুৱা বৈধ বাসিন্দাৰ মাটি কাঠি গতাই দিয়াৰ এক বৃহৎ আয়োজন চলাইছে। এনেদৰে দুখীয়া জনজাতীয়, পিছপৰা জাতিৰ আৰু চৰবাসী মানুহক দিনটোৰ ভিতৰতে বাটৰ ভিখাৰীত পৰিণত কৰা হৈছে। ই হেনো ঔদ্যোগীকৰণৰ ‘বিকাশ’ৰ প্ৰস্তুতি। মানুহ মাৰি ৰাজ্যৰ যি ‘বিকাশ’ৰ ব্যৱস্থা কৰা হৈছে, সি  পিশাচৰ ৰূপ লৈছে। এই পৈশাচিক চৰিত্ৰত ঢাকোন দিবলৈ চৰকাৰ পোহনীয়া মাধ্যমবোৰত দিনে-নিশাই প্ৰকাশ্যে আৰু কেতিয়াবা কৌশলেৰে এটা মুছলিম বিৰোধী প্ৰচাৰ অভিযান চলোৱা পৰিলক্ষিত হৈছে। সেয়ে অসম সন্মিলিত নাগৰিক অভিৱৰ্তনৰ আহ্বায়কসকলে চৰকাৰক এনে উচ্ছেদ বন্ধ কৰিবলৈ দাবী জনায় আৰু ৰাইজকো এই পৈশাচিক চৰকাৰী চক্ৰান্তৰ বিৰুদ্ধে সজাগ হ’বলৈ সকিয়াই দিয়ে।