আকৌ ট্ৰাম্পৰ নতুন ভাবুকি-‘ভাৰতৰ সৈতে আৰু কোনো বাণিজ্যিক আলোচনা নহয়’

ভাৰতীয় সামগ্ৰীৰ ওপৰত ৫০ শতাংশ শুল্ক আৰোপ কৰাৰ পিছতো ক্ষান্ত হোৱা নাই আমেৰিকাৰ ৰাষ্ট্ৰপতিগৰাকীয়ে। এইবাৰ ড’নাল্ড ট্ৰাম্পৰ নতুন ভাবুকি হ’ল তেওঁ ভাৰতৰ সৈতে আৰু কোনো বাণিজ্যিক আলোচনা নকৰে। বৃহস্পতিবাৰে অ’ভাল হাউচত সাংবাদিকৰ প্ৰশ্নৰ উত্তৰত তেওঁ এই কথা স্পষ্ট কৰি দিয়ে।

বিগত কেইমাহমানৰ পৰা আমেৰিকাই ভাৰতৰ সৈতে দ্বিপাক্ষিক বাণিজ্যিক চুক্তিৰ আলোচনাত মিলিত হৈছিল। কেন্দ্ৰীয় চৰকাৰে ঘোষণা কৰিছে যে ভাৰতে কৃষি আৰু দুগ্ধজাত সামগ্ৰীৰ বজাৰ আমেৰিকাৰ বাবে মুকলি নকৰে। ইয়াকে লৈ অতিশয় ক্ষুব্ধ ট্ৰাম্প।

আমেৰিকাৰ ৰাষ্ট্ৰপতিয়ে প্ৰথমে ভাৰতীয় সামগ্ৰীৰ ওপৰত ২৫ শতাংশ শুল্ক আৰোপ কৰিছিল। ইয়াৰ পিছত বুধবাৰে আৰু ২৫ শতাংশ শুল্ক আৰোপ কৰিব বুলি ঘোষণা কৰে। মুঠতে ভাৰতীয় সামগ্ৰীৰ ওপৰত ৫০ শতাংশ শুল্ক আৰোপ কৰা হ’ব।

সাংবাদিকসকলে ট্ৰাম্পক প্ৰশ্ন কৰিছিল, ভাৰতৰ ওপৰত ৫০ শতাংশ শুল্ক আৰোপ কৰাৰ পিছত আৰু কি কি বাণিজ্যিক আলোচনা অনুষ্ঠিত হ’ব? ইয়াৰ উত্তৰত ট্ৰাম্পে কয় যে সমস্যা সমাধান নোহোৱালৈকে নহয়।

অতিৰিক্ত শুল্ক আৰোপ কৰাৰ ক্ষেত্ৰতো ভাৰতে তীব্ৰ প্ৰতিক্ৰিয়া প্ৰকাশ কৰিছে। বৈদেশিক পৰিক্ৰমা মন্ত্ৰালয়ে এক বিবৃতিত কয়, “অন্যায়, অযুক্তিকৰ আৰু অসাৱধানতাৰ সিদ্ধান্ত। বজাৰৰ পৰিস্থিতি আৰু ১৪০ কোটি ভাৰতীয়ৰ ইন্ধনৰ সুৰক্ষাৰ কথা মনত ৰাখি ৰাছিয়াৰ পৰা তেল আমদানি কৰা হয় বুলি ভাৰতে কেইবাবাৰো স্পষ্ট কৰি দিছে।”

প্ৰধানমন্ত্ৰী নৰেন্দ্ৰ মোদীয়েও বৃহস্পতিবাৰে কয় যে কৃষকৰ স্বাৰ্থ আমাৰ বাবে প্ৰথম। অৱশ্যে এই সকলোবোৰ কথা শুনিবলৈ বা মানি ল’বলৈ অনিচ্ছুক ট্ৰাম্প। এইবাৰ ভাৰতৰ সৈতে বাণিজ্যিক আলোচনা বন্ধ কৰাৰ হুংকাৰ দিছে।

সেয়ে, অদূৰ ভৱিষ্যতে ভাৰত আৰু আমেৰিকাৰ মাজত বাণিজ্য বন্ধ হ’ব পাৰে নেকি? সেই প্ৰশ্নটোও উত্থাপন হৈছে।