ছিংগাপুৰৰ পৰা কেতিয়া আহি পাব জুবিনৰ নশ্বৰ দেহ? শেষকৃত্য অনুষ্ঠানৰ বাবে কি প্ৰস্তুতি চলিছে?

ছিংগাপুৰৰ পৰা জুবিন গাৰ্গৰ নশ্বৰ দেহ কেতিয়া অসমলৈ অনা হ’ব সেই সন্দৰ্ভত এতিয়াও চূড়ান্ত সিদ্ধান্ত হোৱা নাই। ইতিমধ্যে ছিংগাপুৰ আৰক্ষীয়ে সমগ্ৰ ঘটনাক লৈ অনুসন্ধান আৰম্ভ কৰিছে। জুবিনৰ মৃত্যুৰ ঘটনাৰ সৈতে যদিহে আৰক্ষীয়ে কোনো সন্দেহজনক তথ্য লাভ নকৰে তেনেহ’লে ছিংগাপুৰৰ সময় মতে আজি পুৱা ১০.৩০ বজাত তেওঁৰ মৃতদেহ অসমলৈ অনাৰ বাবে অনুমতি প্ৰদান কৰা হ’ব।

আনহাতে, আৰক্ষীয়ে যদি কোনো সন্দেহজনক তথ্য লাভ কৰে তেনেহ’লে ছিংগাপুৰৰ সময় মতে কাইলৈ দিনৰ ১২.৩০ বজাত মৃতদেহৰ মৰণোত্তৰ পৰীক্ষা কৰা হ’ব আৰু তাৰ পিছতহে অসমলৈ মৃতদেহ অনাৰ অনুমতি দিয়া হ’ব।

ইপিনে, মৰণোত্তৰ পৰীক্ষাৰ পিছতো সকলো আনুষ্ঠানিকতা সম্পূৰ্ণ কৰিবলৈ আন দুই-তিনিঘণ্টা সময়ৰ প্ৰয়োজন হ’ব। জানিব পৰা মতে, শনিবাৰে জুবিনৰ মৃতদেহৰ মৰণোত্তৰ পৰীক্ষা কৰাটো প্ৰায় নিশ্চিত।

ছিংগাপুৰৰ পৰা দিল্লী হৈ গুৱাহাটীলৈ অহা বিমানত কমেও ৬ ঘন্টা সময় লাগে। তেনেক্ষেত্ৰত নিশা হয়তো প্ৰায় ৮ মান বজাৰ ভিতৰত গুৱাহাটীত আহি পাবহি জুবিনৰ নশ্বৰ দেহ।

ছিংগাপুৰত জুবিনৰ মৃত্যু হোৱাৰ বাবে দেশখনৰ আইন, নীতি নিয়ম অনুসৰি জুবিনৰ মৃতদেহ প্ৰেৰণৰ অনুমতি দিয়া হ’ব। ছিংগাপুৰ আৰক্ষীয়ে শুকুৰবাৰেই ঘটনাৰ তদন্ত প্ৰক্ৰিয়া আৰম্ভ কৰিছে। ঘটনা সন্দৰ্ভত আৰক্ষীয়ে ইতিমধ্যে কেইবাগৰাকী ব্যক্তিক সোধাপোচা কৰিছে।

সূত্ৰসমূহৰ মতে, গুৱাহাটীৰ বিমান বন্দৰৰ পৰা জুবিনৰ নশ্বৰ দেহ পোনে পোনে তেওঁৰ কাহিলীপাৰাৰ বাসগৃহলৈ লৈ অনা হ’ব। সাংস্কৃতিক মন্ত্ৰী বিমল বৰাই জানিবলৈ দিয়া মতে গুৱাহাটীত জুবিনৰ নশ্বৰ দেহ আহি পোৱাৰ পিছত তেওঁৰ শেষকৃত্য সন্দৰ্ভতো চৰকাৰীভাবে সকলো ব্যৱস্থা কৰা হ’ব।

মন্ত্ৰী বৰাই জানিবলৈ দিয়া মতে, জুবিনৰ অনুৰাগীসকলে তেওঁলোকৰ প্ৰিয় শিল্পীগৰাকীক অন্তিম শ্ৰদ্ধাঞ্জলি জনাবলৈ কমেও এদিন তেওঁৰ নশ্বৰ দেহ সৰুসজাই ষ্টেডিয়ামত ৰখা হ’ব। পৰিস্থিতিলৈ চাই সৰুসজাই ষ্টেডিয়ামত হয়তো দুই বা তিনিদিনলৈও জুবিনৰ নশ্বৰ দেহ ৰখা হ’ব পাৰে। ইয়াৰ পিছত তেওঁৰ শেষকৃত্যৰ অনুষ্ঠানটো ৰাইজৰ ইচ্ছা অনুসৰি গুৱাহাটী অথবা তেওঁৰ গৃহ চহৰ যোৰহাটত সম্পূৰ্ণ ৰাজ্যিক মৰ্যাদাৰে সম্পন্ন কৰা হ’ব।

বৰ্তমান জুবিনৰ বিয়োগত শোকস্তব্ধ সমগ্ৰ অসম। গোটেই নিশা কাহিলীপাৰাৰ জুবিনৰ বাসগৃহত অজস্ৰ গুণমুগ্ধই ভিৰ কৰে। জুবিনক স্মৰণ কৰি কাতৰ হৈ পৰিছে অনুৰাগীসকল।