জুবিন গাৰ্গক চূড়ান্ত অৱহেলাৰে মৃত্যুমুখলৈ ঠেলি দিয়া শ্যামকানু মহন্ত, সিদ্ধাৰ্থ শৰ্মাসহ অভিযোগ উঠা সকলোক গ্ৰেপ্তাৰত ইমান বিলম্ব কিয় ?

মৰমৰ শিল্পী জুবিন গাৰ্গৰ  মৃত্যুৰ সৈতে জড়িত বুলি অভিযোগ উঠা শ্যামকানু মহন্ত, সিদ্ধাৰ্থ শৰ্মাসহ সকলো ব্যক্তিক শীঘ্ৰে গ্ৰেপ্তাৰ কৰি তদন্ত প্ৰক্ৰিয়া খৰতকীয়া কৰিবলৈ দাবী জনাইছে ভাৰতৰ গণতান্ত্ৰিক যুৱ ফেডাৰেছন চমুকৈ ডি ৱাই এফ আইৰ অসম ৰাজ্যিক কমিটিয়ে।

ডি ৱাই এফ আইয়ে জুবিন গাৰ্গৰ মৰদেহৰ পুনৰ পোষ্টমৰ্টেমৰ ঘোষণাক আদৰণি জনাইছে যদিও আংশিকভাৱেহে সংবাদমাধ্যমত প্ৰকাশ পোৱা

 চিংগাপুৰৰ মেডিকেলৰ পোষ্টমৰ্টেমৰ ৰিপোৰ্ট ৰাজহুৱাকৈ প্ৰকাশ কৰিবলৈ দাবী কৰিছে।

  মৰমৰ শিল্পী জুবিন গাৰ্গৰ মৃত্যুক লৈ ন ন তথ্য পোহৰলৈ আহিছে আৰু তেওঁৰ লগত চিংগাপুৰলৈ যোৱাসকলোৰ ভিন্ন ধৰ্মী মন্তব্য শুনিবলৈ পোৱা গৈছে। ইয়ে ৰাজ্যবাসীৰ লগতে আমাৰ মনত সন্দেহৰ ভাব অধিক গভীৰ কৰি তুলাৰ লগতে মৰ্মাহত আৰু ক্ষুব্ধ কৰি তুলিছে। সৰ্বজনবিদিত কথা

যে অভিযোগ উঠা শ্যামকানু মহন্তৰ ৰাজনৈতিক সম্পৰ্কত অতি গভীৰ। এই সম্পৰ্কৰ বলতে তেওঁ চৰকাৰী ধনেৰে কোটি কোটি টকাৰ অনুষ্ঠান পাতি আহিছে। তেওঁলোকৰ আমন্ত্ৰণত আৰু সিদ্ধাৰ্থ শৰ্মাসহ একাংশৰ সহযোগত জুবিন গাৰ্গক বহিঃৰাষ্ট্ৰলৈ নিয়া হৈছিল । বহিঃৰাষ্ট্ৰত জুবিন গাৰ্গক যত্ন লোৱাৰ ক্ষেত্ৰত গুৰুতৰ অৱহেলা কৰা পৰিলক্ষিত হৈছে, আনকি তেখেতক প্ৰয়োজনীয় ঔষধ পাতি যোগান ধৰাৰ ক্ষেত্ৰতো গুৰুতৰ অৱহেলা কৰা পৰিলক্ষিত হৈছে। এনে অৱস্থাত অভিযোগ উঠা সকলোক সাধাৰণ তদন্তইযে ঢুকি নাপাব সেয়া নিশ্চিত। সেয়ে ডি ৱাই এফ আই দাবী কৰিছে শীঘ্ৰে পুংখানুপুংখ তদন্ত ব্যৱস্থা কৰক।