ভাৰতলৈ নাহে লিয়নেল মেছি! কেৰালাত অনুষ্ঠিত হোৱাৰ কথা আছিল ফুটবল খেল

আৰ্জেণ্টিনাৰ ফুটবল দল তথা তাৰকা খেলুৱৈ লিয়নেল মেছিয়ে অহা মাহত কেৰালা ভ্ৰমণ নকৰে।

১৭ নৱেম্বৰত কোচিৰ জৱাহৰলাল নেহৰু ষ্টেডিয়ামত অনুষ্ঠিত হ’বলগীয়া এখন খেল এতিয়া ফিফাৰ পৰৱৰ্তী আন্তঃৰাষ্ট্ৰীয় মেচ উইণ্ডোৰ সময়ত অনুষ্ঠিত হ’ব।

এই তথ্য ছ’চিয়েল মিডিয়াত শ্বেয়াৰ কৰিছে প্ৰীতি মেচখনৰ পৃষ্ঠপোষক ৰিপ’ৰ্টাৰ ব্ৰডকাষ্টিং কোম্পানীৰ পৰিচালন সঞ্চালক এণ্টো অগাষ্টিনে।

এণ্টো অগাষ্টিনে ফেচবুকত লিখিছে যে খেলখনৰ বাবে ফিফাৰ অনুমতি লাভ কৰাত পলম হোৱাৰ বাবে আৰ্জেণ্টিনাৰ ফুটবল এছ’চিয়েশ্যনৰ সৈতে হোৱা বৈঠকৰ অন্তত এই সিদ্ধান্ত লোৱা হৈছে।

আৰ্জেণ্টিনাৰ খেলখনৰ কথা ঘোষণা কৰিছিল কেৰালাৰ ক্ৰীড়া মন্ত্ৰীয়ে। কিন্তু এতিয়া এই খেল বাতিল হোৱা বুলি জনাইছে মন্ত্ৰীগৰাকীয়ে।