দহিকাটা সংৰক্ষিত বনাঞ্চলত চলিছে ব্যাপক উচ্ছেদ অভিযান; প্ৰায় ১১৪৩ বিঘা ভূমি বেদখলমুক্তৰ লক্ষ্য

দেওবাৰে পুৱা ৭ বজাৰ পৰা গোৱালপাৰা জিলাৰ দহিকাটা সংৰক্ষিত বনাঞ্চলত বৃহৎ উচ্ছেদ অভিযান আৰম্ভ হৈছে। এইক্ষেত্ৰত জিলা প্ৰশাসনৰ সম্পূৰ্ণ সাজু হৈ অভিযানত নামিছে। প্ৰায় ১১৪৩ বিঘা বেদখল কৰা বনাঞ্চলৰ ভূমিক বেদখল মুক্ত কৰাৰ লক্ষ্যৰে এই অভিযান চলোৱা হৈছে।

মুখ্যমন্ত্ৰী হিমন্ত বিশ্ব শৰ্মাই আনুষ্ঠানিকভাৱে ঘোষণা কৰি কৈছিল যে ৯ আৰু ১০ নৱেম্বৰ দুদিন এই অভিযান অব্যাহত থাকিব। তাৰপিছতে আৰম্ভ কৰা হৈছে এই অভিযান।

এই উচ্ছেদ অভিযানত ২০খনতকৈও অধিক এক্সকেভেটৰ নিয়োগ কৰা হৈছে। আনহাতে আৰক্ষী, অৰ্ধসামৰিক বাহিনী, বনৰক্ষী আৰু কমাণ্ডোকে ধৰি ৯০০ৰো অধিক কৰ্মীয়ে এই অভিযান চোৱাচিতা কৰি আছে।

কৰ্তৃপক্ষই বনাঞ্চলৰ ভিতৰত অবৈধভাৱে বাস কৰা ৭০০ৰো অধিক পৰিয়ালক উচ্ছেদ কৰাৰ লক্ষ্য লৈছে, যিটো যোৱা কিছু বছৰত অসমৰ অন্যতম উল্লেখযোগ্য বনাঞ্চল বেদখলমুক্ত অভিযান।

ইপিনে, উচ্ছেদৰ পূৰ্বেই কেইবাটাও পৰিয়ালে নিজৰ ঘৰ-বাৰী নিজেই ভাঙি নিবলৈ আৰম্ভ কৰিছে। গাঁৱৰ মানুহে টিনৰ চালিৰ ঘৰ ভাঙি খৰখেদাকৈ সামগ্ৰী আঁতৰাই নিয়াও দেখা গৈছে।

বাসিন্দাসকলৰ একাংশই এই উচ্ছেদক অমানৱীয় বুলি অভিহিত কৰি ভৱিষ্যত অনিশ্চয়তাৰ বাবে উদ্বেগ প্ৰকাশ কৰিছে। চৰকাৰে স্থানান্তৰ বা পুনৰ্বাসনৰ পৰিকল্পনা নকৰাৰ অভিযোগ তুলি শিশুসকলে বিদ্যালয় এৰিবলৈ বাধ্য হ’ব পাৰে বুলিও শংকা প্ৰকাশ কৰে।

চলিত সপ্তাহৰ আৰম্ভণিতে মুখ্যমন্ত্ৰী শৰ্মাই নিজৰ অফিচিয়েল ফেচবুক পেজত মাজ নিশাৰ লাইভত উচ্ছেদৰ প্ৰতি চৰকাৰৰ দায়বদ্ধতাক পুনৰ দোহাৰি স্থগিত ৰখাৰ জল্পনা-কল্পনাক নাকচ কৰে। তেওঁ কৈছিল, ‘কিছুমান গোটে উচ্ছেদ অভিযান বন্ধ কৰাৰ ষড়যন্ত্ৰ কৰিছে। “তেওঁলোকে এসময়ত অসমক আন এখন নেপাললৈ ৰূপান্তৰিত কৰাৰ ষড়যন্ত্ৰ কৰিছিল। কিন্তু আমি অসমক নেপাল হ’বলৈ নিদিওঁ, আৰু উচ্ছেদ বন্ধ নহ’ব।”

অভিযোগ অনুসৰি, গোৱালপাৰাৰ দক্ষিণ খণ্ডৰ কাষৰীয়া দহিকাটা সংৰক্ষিত বনাঞ্চলত বিগত দশকত ক্ৰমাগতভাৱে বেদখল চলি আহিছে। কৰ্তৃপক্ষই কয় যে এই অভিযানৰ লক্ষ্য হৈছে অসম বন বিভাগৰ দীৰ্ঘম্যাদী সংৰক্ষণ পৰিকল্পনাৰ অধীনত পৰিৱেশ ভাৰসাম্য পুনৰুদ্ধাৰ আৰু সংৰক্ষিত বনাঞ্চলৰ সীমা শক্তিশালী কৰা।