বিৰোধী ঐক্যক আদৰণি অসম নাগৰিক সন্মিলনৰ

২০২৬ চনৰ বিধানসভা নিৰ্বাচনৰ পূৰ্বে কংগ্ৰেছৰ উদ্যোগত অসমৰ সকলো বিৰোধী দলে এক ঐক মঞ্চ গঢ়ি তুলিছে। বিৰোধীৰ এই পদক্ষেপক ‘অতি তাৎপৰ্যপূৰ্ণ’ বুলি উল্লেখ কৰিছে অসম নাগৰিক সন্মিলনে।

বৃহস্পতিবাৰে জাৰি কৰা এক বিবৃতিত নাগৰিক সন্মিলনে কয় যে অসম সংকটজনক সন্ধিক্ষণত আছে। জনজাতিকৰণৰ দাবী, ভূমি নীতি, জুবিন গাৰ্গৰ মৃত্যু আদিক কেন্দ্ৰ কৰি ব্যাপক আন্দোলনৰ সৃষ্টি হৈছে।

নাগৰিক সন্মিলনে শাসকীয় বিজেপিক ৰাজনৈতিক লাভালাভৰ বাবে জনগোষ্ঠীসমূহক বিভাজিত কৰাৰ চেষ্টা চলোৱাৰ অভিযোগ উত্থাপন কৰে। সন্মিলনে লগতে কয় যে হিমন্ত বিশ্ব শৰ্মাৰ দায়িত্বহীন মন্তব্যই সমাজখন বিভাজিত কৰাত উদগনি জনাইছে।

বিবৃতিটোত কোৱা হৈছে যে, “অসমৰ শক্তি নিহিত হৈ আছে ভাষা, ধৰ্ম, জনজাতি, জাতি-জনগোষ্ঠীৰ বিভিন্ন সম্প্ৰদায়ৰ ঐক্যত। তথাপিও ৰাজনৈতিক স্বাৰ্থৰ বাবে শাসকীয় দলে অসমৰ জনসাধাৰণ একত্ৰিত হৈ থকাটো নিবিচাৰে।”

নাগৰিক সন্মিলনে কয় যে জনসাধাৰণৰ সৈতে দৃঢ়তাৰে থিয় দি থকা একত্ৰিত বিৰোধীয়েহে চৰকাৰৰ ষড়যন্ত্ৰক উফৰাব পাৰিব।

নাগৰিক সন্মিলনে বিৰোধী ঐক্যক নাগৰিক সমাজ আৰু সাধাৰণ নাগৰিকক লৈ কৰি ৰাজহুৱা আন্দোলন গঢ়ি তুলিবলৈ আহ্বান জনায়।

বিবৃতিটোত লগতে কোৱা হৈছে যে, ‘আগন্তুক পৰিস্থিতি ভয়াৱহ। আমি সকলো এক হৈহে এই পৰিস্থিতিৰ লগত মোকাবিলা কৰিব পাৰিম।

অসম নাগাৰিক সন্মিলনৰ হৈ এই বিবৃতি প্ৰকাশ কৰে হীৰেন গোহাঁই, হৰেকৃষ্ণ ডেকা, অজিত কুমাৰ ভূঞা, পৰেশ মালাকাৰ, আব্দুল মান্নান, আৰু শান্তনু বৰঠাকুৰে।