দিল্লীত প্ৰদূষণ দিনটোত ১০-১১টা চিগাৰেট খোৱাৰ সমান! বিদ্যালয়ৰ বাহিৰত খেলা-ধূলা বন্ধ

প্ৰদূষণ আৰু দিল্লী বৰ্তমান এটা মুদ্ৰাৰ ইপিঠি-সিপিঠি। দীপাৱলীৰ পৰা প্ৰতি বছৰে ৰাজধানী দিল্লীক প্ৰদূষণৰে আবৃত কৰি পেলাই। এইবাৰো ইয়াৰ ব্যতিক্ৰম নাছিল। দীপাৱলীৰ পৰা বহুদিন পাৰ হোৱাৰ পাছতো প্ৰদূষণৰ মাত্ৰা এতিয়াও ‘বিপজ্জনক’ মাত্ৰাত আছে। এনে পৰিস্থিতিত ৰাজধানীৰ সকলো বিদ্যালয়তে ‘বাহিৰৰ কাম-কাজ’ বন্ধ কৰি দিয়া হৈছে।

এদিন পূৰ্বে উচ্চতম ন্যায়ালয়ে ‘বায়ুৰ গুণাগুণ ব্যৱস্থাপনা’ক নিৰ্দেশ দিছিল যে নৱেম্বৰ আৰু ডিচেম্বৰ মাহত দিল্লীত বাৰ্ষিক ক্ৰীড়া প্ৰতিযোগিতা বা আন কোনো ধৰণৰ ‘বাহিৰৰ কাম-কাজ’ অনুষ্ঠিত কৰিবলৈ দিয়া নহ’ব। এইবাৰ সেই নিৰ্দেশ অনুসৰি ব্যৱস্থা গ্ৰহণ কৰিছে দিল্লী চৰকাৰে। নিৰ্দেশনাটোত স্পষ্টকৈ উল্লেখ আছে যে দিল্লী-এনচিআৰৰ কোনো বিদ্যালয়তে ক্ৰীড়া সম্পৰ্কীয় কোনো অনুষ্ঠান আয়োজন কৰিব নালাগে।

এই সপ্তাহত দিল্লীৰ বায়ুৰ গুণাগুণ বিপজ্জনক মাত্ৰালৈ হ্ৰাস পাইছে। যিটো ‘অতি নিম্ন’ আৰু ‘গুৰুতৰ’ৰ মাজত আছে। শুকুৰবাৰে দিল্লীত গড় AQI আছিল ৩৭৩, যিটো দিনটোত প্ৰায় ১০-১১ টা চিগাৰেট খোৱাৰ সমতুল্য। প্ৰসংগক্ৰমে দিল্লীৰ বতাহ বিষাক্ত হৈ পৰিছে দীপাৱলীৰ পৰা। সেইবাবেই দিল্লী চৰকাৰে ‘ক্লাউড ছিডিং’ৰ ব্যৱস্থা কৰিলে। শেহতীয়াকৈ ইয়াৰ পৰীক্ষাও কৰা হৈছিল। কিন্তু বৰষুণ হোৱা নাছিল। অৱশ্যে তিনিটা বিফল পৰীক্ষাৰ বাবে ইতিমধ্যে প্ৰায় ১.০৭ কোটি টকা ব্যয় কৰা হৈছে। কিন্তু লাভ হোৱা নাই। ইয়াৰ বিপৰীতে প্ৰদূষণ বাঢ়িছে। দেওবাৰেও দিল্লীৰ বায়ুৰ গুণাগুণ ‘অতি বেয়া’ স্তৰত আছিল। দিল্লীবাসীৰ ‘শ্বাসৰুদ্ধকৰ’ অৱস্থা। আৰু এই পৰিবেশত বেমাৰ বাঢ়িছে। উদ্বিগ্নতা বাঢ়িছে। কিছুদিন পূৰ্বে দিল্লীৰ এটা অংশই ইণ্ডিয়া গেটৰ সন্মুখত প্ৰদূষণৰ বিৰুদ্ধে প্ৰতিবাদ সাব্যস্ত কৰিছিল। ইয়াৰে বহুকেইজনকো আটক কৰে আৰক্ষীয়ে। অনুমতি নথকা সত্ত্বেও তাত প্ৰতিবাদ সাব্যস্ত কৰা বুলি অভিযোগ উত্থাপন কৰে আৰক্ষীয়ে।