শান্তিৰ নোবেল বিজয়ী নাৰ্গেছ মহম্মদীক গ্ৰেপ্তাৰ ইৰাণ চৰকাৰৰ

ইৰাণৰ নিৰাপত্তা বাহিনীয়ে নোবেল বঁটা বিজয়ী আৰু মহিলা অধিকাৰ কৰ্মী নাৰ্গেছ মহম্মদীক গ্ৰেপ্তাৰ কৰাৰ কথা তেওঁৰ ফাউণ্ডেচনে প্ৰকাশ কৰিছে।

নাৰ্গেছ ফাউণ্ডেচনে জনোৱা অনুসৰি, ৫৩ বছৰীয়া মহম্মদীক অন্যান্য কৰ্মীসকলৰ সৈতে পূবৰ মাছহাদ চহৰত আটক কৰি ৰখা হৈছে।

নোবেল কমিটীয়ে এই ঘটনাই তেওঁলোকক গভীৰভাৱে উদ্বিগ্ন কৰি তুলিছে বুলি মন্তব্য কৰিছে আৰু কৰ্তৃপক্ষক “মহম্মদীৰ অৱস্থান তৎক্ষণাত স্পষ্ট কৰিবলৈ, তেওঁৰ সুৰক্ষা আৰু সততা নিশ্চিত কৰিবলৈ আৰু তেওঁক বিনা চৰ্তত মুকলি কৰি দিবলৈ” আহ্বান জনাইছে। এই সন্দৰ্ভত ইৰাণে কোনো মন্তব্য কৰা নাই।

মানৱ অধিকাৰৰ প্ৰসাৰ আৰু ইৰাণত নাৰীৰ ওপৰত হোৱা অত্যাচাৰৰ বিৰুদ্ধে যুঁজ দিয়াৰ বাবে মহম্মদীয়ে ২০২৩ চনত শান্তিৰ নোবেল বঁটা লাভ কৰিছিল।

তেওঁ ২০২১ চনৰ পৰা তেহৰাণৰ কুখ্যাত ইভিন কাৰাগাৰত বন্দী হৈ আছিল আৰু ২০২৪ চনৰ ডিচেম্বৰ মাহত চিকিৎসাজনিত কাৰণত তিনি সপ্তাহৰ বাবে অস্থায়ীভাৱে জেলৰ পৰা মুকলি কৰি দিয়া হৈছিল। তেওঁ অতি সোনকালে কাৰাগাৰলৈ উভতি যোৱাৰ কথা আছিল, য’ত তেওঁ একাধিক শাস্তি ভুগি আছিল।

তেওঁক শেহতীয়াকৈ অধিবক্তা খোছৰ’ আলিকোৰ্ডিৰ স্মৃতিচাৰণ অনুষ্ঠানত অংশগ্ৰহণ কৰাৰ সময়তে গ্ৰেপ্তাৰ কৰা বুলি জানিব পৰা গৈছে, যোৱা সপ্তাহত আলিকোৰ্ডিক কাৰ্যালয়ত মৃত অৱস্থাত উদ্ধাৰ হৈছিল। নৰৱেৰ ইৰাণ হিউমেন ৰাইটছে আলিকোৰ্ডিৰ মৃত্যুৰ পৰিস্থিতি “সন্দেহজনক” বুলি উল্লেখ কৰি স্বতন্ত্ৰ তদন্তৰ আহ্বান জনাইছে।