চলন্ত ৰে’লত ভয়ংকৰ অগ্নিকাণ্ড! জ্বলিল টাটানগৰ-এৰ্নাকুলাম ছুপাৰ ফাষ্টৰ দুটা ডবা, ১জনৰ মৃত্যু

অন্ধ্ৰ প্ৰদেশৰ ইয়েলামাঞ্চিলি ষ্টেচনৰ সমীপত টাটানগৰ-এৰ্নাকুলাম ছুপাৰ ফাষ্ট এক্সপ্ৰেছত সোমবাৰে পুৱতি নিশা সংঘটিত হোৱা অগ্নিকাণ্ডত এজন যাত্ৰীৰ মৃত্যু হয়। আৰক্ষীয়ে এজন লোকৰ মৃত্যু হোৱা বুলি নিশ্চিত কৰিছে যদিও এতিয়ালৈকে ৰে’ল কৰ্তৃপক্ষই হতাহতৰ কোনো চূড়ান্ত তথ্য দিয়া নাই।

আৰক্ষী সূত্ৰৰ পৰা জানিব পৰা মতে, পুৱতি নিশা প্ৰায় ১:৪৫ বজাত ৰে’লখন ইয়েলামাঞ্চিলি ষ্টেচনত প্ৰৱেশ কৰাৰ ঠিক আগতেই এই অগ্নিকাণ্ড সংঘটিত হয়। ৰে’লখনৰ বি-১ আৰু এম-২ ডবাত হঠাৎ অগ্নিকাণ্ড সংঘটিত হয়। নিমিষতে জুই বিয়পি পৰাত দবাবোৰ দাউ দাউকৈ জ্বলিবলৈ ধৰে।

দুৰ্ঘটনাৰ সময়ত বি-১ত ৮২জন আৰু এম-২ত ৭৬জন যাত্ৰী আছিল। মাজনিশাৰ এই ভয়াবহ পৰিস্থিতিত যাত্ৰীসকলে নিজৰ প্ৰাণ ৰক্ষাৰ বাবে লৰালৰিকৈ দৌৰিবলৈ ধৰে।

ঘটনাৰ তথ্য লাভ কৰাৰ লগে লগে অগ্নিনিৰ্বাপক বাহিনীয়ে দ্ৰুতগতিত সেই স্থানত উপস্থিত হয় আৰু উদ্ধাৰ অভিযান আৰম্ভ হয়। জুই নিয়ন্ত্ৰণ কৰিবলৈ চেষ্টা কৰাৰ উপৰিও আৰক্ষীয়ে তদন্ত আৰম্ভ কৰি কেনেদৰে অগ্নিকাণ্ড সংঘটিত হ’ল সেই বিষয়ে জানিবলৈ চেষ্টা কৰিছে।