জয়পুৰ আদালতত ৰাহুল গান্ধীৰ সকাহ, প্ৰধানমন্ত্ৰীৰ জাতি সম্পৰ্কীয় মন্তব্যৰ বিৰুদ্ধে দাখিল কৰা আবেদন নাকচ

প্ৰধানমন্ত্ৰী নৰেন্দ্ৰ মোডীৰ বিৰুদ্ধে জাতিভিত্তিক মন্তব্য কৰাৰ অভিযোগত কংগ্ৰেছ নেতা ৰাহুল গান্ধীৰ বিৰুদ্ধে দাখিল কৰা এখন পুনৰীক্ষণ আবেদন জয়পুৰৰ এখন আদালতে নাকচ কৰিছে। জয়পুৰৰ অতিৰিক্ত অধিবেশন আদালতে এই বিষয়ত হস্তক্ষেপ কৰিবলৈ অস্বীকাৰ কৰি নিম্ন আদালতৰ পূৰ্বৰ নিৰ্দেশকে বাহাল ৰাখে। অতিৰিক্ত অধিবেশনৰ ন্যায়াধীশ নীলম কাৰ্ৱাই এই ৰায়দান কৰি উল্লেখ কৰে যে আবেদনকাৰীয়ে দাখিল কৰা তথ্য আৰু নথি-পত্ৰই অভিযোগসমূহ প্ৰমাণ কৰিবলৈ পৰ্যাপ্ত নহয়। ইয়াৰ পূৰ্বে মেট্ৰ’পলিটান মেজিষ্ট্ৰেট আদালতে এই গোচৰটো খাৰিজ কৰিছিল, যাক প্ৰত্যাহ্বান জনাই অধিবক্তা বিজয় কালাণ্ডাৰে পুনৰ আবেদন জনাইছিল।

আবেদনকাৰীৰ অভিযোগ আছিল যে ৰাহুল গান্ধীয়ে ২০২৪ চনত ছত্তীশগড়ত ভাৰত জোডো ন্যায় যাত্ৰাৰ সময়ত প্ৰধানমন্ত্ৰী মোডীৰ জাতিক লৈ বিতৰ্কিত মন্তব্য কৰিছিল। ৰাহুল গান্ধীয়ে দাবী কৰিছিল যে প্ৰধানমন্ত্ৰী নৰেন্দ্ৰ মোডী জন্মসূত্ৰে অন্যান্য পিছপৰা শ্ৰেণী বা অ’বিচি সম্প্ৰদায়ৰ নহয়। গান্ধীৰ মতে মোডীৰ জন্ম হৈছিল এটা সাধাৰণ শ্ৰেণীৰ পৰিয়ালত আৰু পিছতহে তেওঁলোকৰ সম্প্ৰদায়ক অ’বিচিৰ মৰ্যাদা দিয়া হৈছিল। অধিবক্তা কালাণ্ডাৰে যুক্তি দিছিল যে এনে ধৰণৰ মন্তব্যই সমাজত বিভেদ সৃষ্টি কৰাৰ লগতে দেশৰ শান্তি আৰু ঐক্য বিঘ্নিত কৰিব পাৰে।

এই বিতৰ্কৰ মাজতে ভাৰতীয় জনতা পাৰ্টিয়ে ৰাহুল গান্ধীৰ দাবীক সম্পূৰ্ণ মিছা বুলি অভিহিত কৰিছে। বিজেপিৰ আই টি চেলৰ মুৰব্বী অমিত মালব্যই ১৯৯৯ চনৰ চৰকাৰী তথ্য দাঙি ধৰি জনাইছিল যে মোধ ঘাঞ্চী সম্প্ৰদায়ক বহুত আগতেই অ’বিচি শ্ৰেণীত অন্তৰ্ভুক্ত কৰা হৈছিল। সেই সময়ত নৰেন্দ্ৰ মোডী গুজৰাটৰ মুখ্যমন্ত্ৰী হোৱা নাছিল। আনকি গুজৰাটৰ প্ৰাক্তন উপ-মুখ্যমন্ত্ৰী নৰহৰি আমিনেও কৈছিল যে ১৯৯৪ চনত কংগ্ৰেছ চৰকাৰৰ দিনতহে এই সম্প্ৰদায়টোক পিছপৰা শ্ৰেণীৰ মৰ্যাদা প্ৰদান কৰা হৈছিল।

উল্লেখ্য যে প্ৰধানমন্ত্ৰী মোডীৰ উপাধি আৰু জাতিক লৈ কৰা মন্তব্যৰ বাবে ৰাহুল গান্ধীয়ে ইয়াৰ পূৰ্বেও আইনী জটিলতাত ভৰি দিছিল। ২০২৩ চনত চুৰাটৰ এখন আদালতে মোদী উপধিক লৈ কৰা এক মন্তব্যৰ বাবে তেওঁক দুবছৰৰ কাৰাদণ্ডৰ শাস্তি বিহিছিল, যাৰ বাবে তেওঁৰ সাংসদ পদো খাৰিজ হৈছিল। অৱশ্যে পিছলৈ উচ্চতম ন্যায়ালয়ে সেই ৰায়দানৰ ওপৰত স্থগিতাদেশ জাৰি কৰাত তেওঁ সকাহ লাভ কৰে। বৰ্তমান জয়পুৰ আদালতৰ এই নিৰ্দেশে ৰাহুল গান্ধীৰ বাবে আন এক স্বস্তি কঢ়িয়াই আনিছে।