এতিয়াৰ পৰা দেশত কলাধন ঘটি বিদেশত জমা থৈ ধৰা পৰিলে খাটিব নালাগে কাৰাবাস : সিদ্ধান্ত কেন্দ্ৰীয় চৰকাৰৰ

কেন্দ্ৰীয় চৰকাৰে বিদেশত জমা থকা ক’লা ধন সন্দৰ্ভত এক ডাঙৰ সিদ্ধান্ত গ্ৰহণ কৰিছে যাৰ ফলত এতিয়াৰে পৰা বিদেশলৈ ধন পঠিয়াই ধৰা পৰিলে জেললৈ যোৱাৰ ভয় নাথাকিব। ২০১৪ চনত নৰেন্দ্ৰ মোদীয়ে চৰকাৰ গঠন কৰাৰ পূৰ্বে প্ৰতিশ্ৰুতি দিছিল যে বিদেশৰ পৰা ক’লা ধন ওভতাই অনা হ’ব আৰু প্ৰতিজন নাগৰিকৰ বেংক একাউণ্টত ১৫ লাখ টকাকৈ জমা দিয়া হ’ব। কিন্তু ১২ বছৰ পাৰ হৈ যোৱাৰ পিছতো সেই প্ৰতিশ্ৰুতি বাস্তৱায়িত নহ’ল। তাৰ বিপৰীতে কেন্দ্ৰীয় বিত্ত মন্ত্ৰালয়ে ২০২৬ চনৰ বিত্তীয় বিধেয়কত এক নতুন নিয়ম প্ৰস্তাৱ কৰিছে য’ত কোৱা হৈছে যে বিদেশত ক’লা ধন লুকুৱাই ৰাখিলেও এতিয়াৰ পৰা জেল নহয় বৰঞ্চ কেৱল জৰিমনা দিলেই চলিব। চৰকাৰৰ এই নতুন নিয়মে এতিয়া সমগ্ৰ দেশতে বিতৰ্কৰ সৃষ্টি কৰিছে।

বিত্ত মন্ত্ৰালয়ৰ প্ৰতিবেদন অনুসৰি যদি কোনো ভাৰতীয় নাগৰিকে বিদেশত ২০ লাখ টকা পৰ্যন্ত ক’লা ধন লুকুৱাই ৰাখে তেন্তে তেওঁলোকৰ বিৰুদ্ধে এই নতুন শিথিল নিয়ম প্ৰযোজ্য হ’ব। ইয়াৰ বাবে ব্লেক মানি এক্ট বা ক’লা ধন আইনৰ সংশোধন কৰা হৈছে। চৰকাৰৰ মতে ক্ষুদ্ৰ কৰদাতাসকলক যাতে অহেতুক হাৰাশাস্তি কৰা নহয় তাৰ বাবেই এই পদক্ষেপ লোৱা হৈছে। কিন্তু বিশেষজ্ঞসকলে এই যুক্তি মানি ল’বলৈ টান পাইছে। তেওঁলোকৰ মতে ২০ লাখ টকাৰ এই সীমাটো কেৱল চকুৰ ধূলি দিয়াৰ দৰেহে। আচলতে ইয়াৰ আঁৰত থকা উদ্দেশ্য হ’ল ভৱিষ্যতে বিদেশত ক’লা ধন ৰখাৰ পথটো মুকলি কৰি দিয়া। বৰ্তমান কম পৰিমাণৰ ধনৰ কথা কোৱা হৈছে যদিও অনাগত সময়ত এই সীমা আৰু বৃদ্ধি কৰা হ’ব পাৰে বুলি বহুতে শংকা প্ৰকাশ কৰিছে।

নতুন বিত্তীয় বিধেয়কৰ মতে বিদেশত থকা সম্পত্তি বা ধনৰ কথা লুকুৱাই ৰাখিলে পূৰ্বতে যি জেল আৰু গধুৰ জৰিমনাৰ ব্যৱস্থা আছিল সেয়া এতিয়াৰ পৰা বাতিল কৰা হ’ব। ২০২৪ চনৰ ১ অক্টোবৰৰ পৰাই এই নতুন সুবিধাটো কাৰ্যকৰী কৰা হ’ব। উল্লেখ্য যে ২০১৫ চনতো চৰকাৰে বিদেশত থকা সম্পত্তি ঘোষণা কৰাৰ বাবে এটা সুযোগ দিছিল। এইবাৰ সেই ব্যৱস্থাটোকে আৰু অধিক সহজ কৰি তোলা হৈছে। যিসকল ছাত্ৰ-ছাত্ৰীয়ে বিদেশত পঢ়িবলৈ গৈছে বা যিসকল কৰ্মচাৰী চাকৰিৰ খাতিৰত বিদেশত আছে তেওঁলোকেও যদি তাত থকা বেংক একাউণ্টৰ কথা জনাবলৈ পাহৰিছে তেন্তে অলপ জৰিমনা দি সেয়া বৈধ কৰি ল’ব পাৰিব। কিন্তু আয়কৰ বিভাগৰ এটা অংশৰ মতে সাধাৰণ মানুহৰ কথা কৈ আচলতে ইচ্ছাকৃতভাৱে ধন লুকুৱাই ৰখাসকলক জেলৰ পৰা ৰক্ষা কৰিবলৈহে এই নিয়ম অনা হৈছে।

বিভিন্ন মহলত আলোচনা হৈছে যে চৰকাৰে একেবাৰতে ডাঙৰ অংকৰ ধনৰ ক্ষেত্ৰত এই নিয়ম আনিলে ৰাজনৈতিকভাৱে সমস্যা হ’ব পাৰে সেয়েহে ২০ লাখ টকাৰ এটা নিৰাপদ সীমা বাছি লোৱা হৈছে। এইটো এটা আৰম্ভণিহে আৰু লাহে লাহে ইয়াৰ পৰিমাণ বৃদ্ধি কৰা হ’ব পাৰে। পূৰ্বতেও দেখা গৈছে যে নগদ লেনদেনৰ ক্ষেত্ৰত পেন কাৰ্ড বাধ্যতামূলক কৰাৰ নিয়মটোও শিথিল কৰা হৈছে। আগতে ৫০ হাজাৰ টকাৰ লেনদেনত পেন কাৰ্ড লাগিছিল কিন্তু এতিয়া সেই সীমা ১০ লাখ টকালৈ বৃদ্ধি কৰা হৈছে। এনেধৰণৰ নিয়মে ক’লা ধন ৰোধ কৰাৰ পৰিৱৰ্তে ক’লা ধনৰ লেনদেন বৃদ্ধি কৰাতহে সহায় কৰিব বুলি একাংশই অভিযোগ কৰিছে। ক’লা ধন ওভতাই অনাৰ প্ৰতিশ্ৰুতি দিয়াৰ ১২ বছৰৰ পিছত চৰকাৰৰ এনে নমনীয় স্থিতিয়ে এতিয়া তীব্ৰ বিৰোধিতাৰ সন্মুখীন হৈছে।