কিয় কংগ্ৰেছ ত্যাগ কৰিছিল হিমন্ত বিশ্ব শৰ্মাই? ভূপেন বৰাৰ দলত্যাগৰ খবৰৰ মাজতেই পুৰণি স্মৃতি সোঁৱৰণ মুখ্যমন্ত্ৰীৰ

প্ৰদেশ কংগ্ৰেছৰ প্ৰাক্তন সভাপতি ভূপেন বৰাই কংগ্ৰেছ ত্যাগ কৰি বিজেপিত যোগদান কৰাৰ দিন ঘোষণা কৰাৰ পাছতেই ৰাজ্যৰ ৰাজনীতিত এক বিশেষ চৰ্চা আৰম্ভ হৈছে। ইয়াৰ মাজতেই মঙলবাৰে সংবাদ মাধ্যমৰ আগত মুখ্যমন্ত্ৰী হিমন্ত বিশ্ব শৰ্মাই তেওঁ এসময়ত কি পৰিস্থিতিত কংগ্ৰেছ ত্যাগ কৰিবলৈ বাধ্য হৈছিল, তাৰ অন্তৰালৰ ৰহস্য ফাদিল কৰে।

মুখ্যমন্ত্ৰী শৰ্মাই ২০১২ চনৰ সেই সময়ছোৱাৰ কথা সোঁৱৰণ কৰি কয় যে তেওঁ আৰু তেওঁৰ সতীৰ্থসকলে কেতিয়াও “পেৰাচ্যুট লেণ্ডিং” কৰা নেতাৰ ওচৰত আত্মসমৰ্পণ কৰিব বিচৰা নাছিল। তেওঁ অভিযোগ কৰে যে তদানীন্তন চৰকাৰৰ কেবিনেট মন্ত্ৰীসকলক গৌৰৱ গগৈৰ সভাত উপস্থিত থাকিবলৈ নিৰ্দেশ দিয়া হৈছিল। ইয়াৰ তীব্ৰ বিৰোধিতা কৰি তেওঁ প্ৰয়াত প্ৰাক্তন মুখ্যমন্ত্ৰী তৰুণ গগৈক স্পষ্টকৈ জনাই দিছিল যে তেওঁ কেতিয়াও এজন পুত্ৰৰ নিৰ্বাচনী সভাত এজন কেবিনেট মন্ত্ৰী হিচাপে মৰ্যাদা লাঘৱ কৰি উপস্থিত নাথাকে। তেওঁৰ মতে, সাংবিধানিক পদবীত থাকি এনে কাম কৰাটো কলংকিত হোৱাৰ দৰে।

বৰ্তমানৰ স্থিতিৰ বাবে সন্তুষ্টি প্ৰকাশ কৰি মুখ্যমন্ত্ৰীয়ে কয় যে সেই সময়ত ৰাহুল গান্ধীয়ে তেওঁক মুখ্যমন্ত্ৰী নপতাতো এক আশীৰ্বাদহে আছিল। তেওঁ কয়, “মোক গোৰ মাৰি গংগাত পেলোৱা হৈছিল বাবেহে আজি ময় বুকু ডাঠ কৰি সনাতন ধৰ্ম আৰু অসমীয়াৰ বাবে কাম কৰিব পাৰিছোঁ।” তেওঁৰ মতে কংগ্ৰেছৰ মুখ্যমন্ত্ৰী হোৱা হ’লে তেওঁৰ নামত এটা কাল কলংক থাকি গ’লহেঁতেন।

কংগ্ৰেছৰ আগন্তুক নিৰ্বাচনী তালিকা সন্দৰ্ভত মুখ্যমন্ত্ৰীয়ে গুৰুতৰ অভিযোগ উত্থাপন কৰে। তেওঁৰ মতে, কংগ্ৰেছৰ আচল তালিকাখন ‘ইনক্লুচিভ মাইণ্ড‘ নামৰ সংস্থাটোৱেহে প্ৰস্তুত কৰিছে। সক্ষম মাৰুৱা আৰু সুনীল কানেগুলাৰ দৰে ব্যক্তিয়ে টিকট বিতৰণৰ নামত কোটি কোটি টকাৰ লেনদেন কৰিছে বুলি তেওঁ দাবী কৰে। বিশেষকৈ সংখ্যালঘু আসনবোৰত বৃহৎ ধনৰ লেনদেন হোৱাৰ বাবে টিকট দিয়াৰ দিনা কংগ্ৰেছত গণ্ডগোল হোৱাটো নিশ্চিত বুলিও তেওঁ মন্তব্য কৰে।

ৰাজ্যৰ আগশাৰীৰ বিৰোধী নেতাসকলৰ ভৱিষ্যত সম্পৰ্কে ভৱিষ্যদ্বাণী কৰি মুখ্যমন্ত্ৰীয়ে কয় যে ২০২৯ চনৰ পূৰ্বেই প্ৰদ্যুৎ বৰদলৈয়ে এশ শতাংশই বিজেপিত যোগদান কৰিব। আনহাতে, ৰিপুণ বৰাই তৃণমূল কংগ্ৰেছলৈ যোৱাৰ ফলত এক “ট্ৰেজেদি”ৰ চিকাৰ হ’ল বুলি তেওঁ কটাক্ষ কৰে। বিৰোধী দলটো কেৱল ৰকিবুল হুছেইন, নুৰুল হুদা আৰু অখিল গগৈৰ দৰে একাংশ নেতাৰ হাতত থাকিব বুলিও তেওঁ উল্লেখ কৰে। ধুবুৰীত সাংসদ ৰকিবুল হুছেইনে ১০ লাখ ভোট পোৱাটো কোনো বিশেষ কৃতিত্ব নহয় বুলিও তেওঁ কটাক্ষ কৰে।